Алматыда үшем дүниеге келді

Алматыда үшем дүниеге келді
397

Алматыда экстракорпоральды ұрықтандыру арқылы үшем дүниеге келді, деп хабарлайды BAQ.KZ.

Жаркенттен келген жас отбасы екі қыз бен бір ұлдың ата-анасы атанды. Бұл туралы Медициналық сақтандыру қоры Алматы қалалық филиалының баспасөз қызметі мәлім етті,  деп жазды ҚазАқпарат.

29 жастағы Гунчигүл жұбайы екеуі - бірнеше жылдан бері бір перзентке зар болған отбасылардың бірі. Айтуынша, мұндай бақытқа кенелем деп ешқашан ойламапты.

Тұрмыс құрғалы бері 4 жыл бойы бала көтере алмадым. Бармаған жерім, баспаған тауым қалған жоқ. Ем-дом еш нәтиже бермеген соң ана болудан тіпті күдерімді үзе бастадым, - деп еске алады ол.

Айтуынша, дәрігерлер денсаулығына байланысты оған «бедеулік» деген диагноз қойған. Бірақ жақсылықтан үміт үзбей, білікті дәрігер іздеуді тоқтатпаған.

Сөйтіп Алматыдағы Репродуктивті медицина орталығына келген.

Сол кезде ЭКО-ны міндетті әлеуметтік медициналық сақтандыру арқылы жасатуға болатынын естіп, қатты қуандым. Себебі ЭКО өте қымбат, оны екінің бірінің қалтасы көтере бермейді. Бұл мен үшін де ақырғы мүмкіндік болды. Сол себепті емханадағы дәрігерге барып кезекке тұрып, қарала бастадым. Әлбетте, мен сияқтылар өте көп, сондықтан кезек күтуге тура келді. Мен шыдамдылық танытып, күттім. Соңында үлкен бақытқа кенелдік. Өмірге екі қыз, бір ұл бала әкелдім, - дейді үшемнің анасы.

Естеріңізге сала кетсек, бағасы қымбат қызметтердің бірі- экстракорпоральды ұрықтандыру 2020 жылдан бері қарай міндетті әлеуметтік медициналық сақтандыру арқылы қаржыландырылып келеді.

2022 жылдың бірінші жартысында осындай 1304 жұп ЭКО жасатқан. Оған сақтандыру есебінен 1,3 млрд теңге бөлінді.

 

Қысқа да нұсқа. Жазылыңыз telegram - ға

Фото: ашық дереккөз
Өзгелердің жаңалығы