Мәжіліс депутаты Ерлік Өмірғали облыстар мен қалалардың әкімдері билік партиясынан шығып, бір мерзімге ғана тағайындалуға тиіс екенін айтты, деп хабарлайды BAQ.KZ тілшісі.
Ол осыған қатысты депутаттық сауалын Премьер-министр Әлихан Смайыловқа жолдады.
Өткен жылдардағы мемлекеттің түйткілді мәселелерінің бірі экономиканың ғана емес, саясаттың да монополияланғаны болды. Экономикалық дағдарыстар, шағын және орта бизнестің күйреуі, девальвация орын алса да, байлар мен кедейлер арасындағы алшақтық қаншалықты ұлғайса да, әділеттілік орнамаса да, әкімдермен және министрлермен сыбайлас жемқорлық жанжалдары орын алса да, ескі Қазақстанның барлық 30 жылында осы әкімдер мен министрлердің бір партиясы – «Нұр Отан» партиясы билікті монополиялап, сайлауды бұрмалап отырды, - деп есептейді ол.
Сөзінше, Президент Қасым-Жомарт Тоқаевтың Мемлекет басшысының саяси партияда болуына және әкімдерге билік партиясының жергілікті филиалдарын басқаруға тыйым салудан бастап, әр түрлі парламенттік партиялардың Үкімет құрамына қатысуы туралы бірқатар конституциялық бастамасы сол тәжірибеге қарсы бағытталды.
Сайлаушылар Президенттің саяси партияға мүше болуына тыйым салуды жақын серіктеріне ғана емес, бүкіл Қазақстан халқына қызмет ету міндеті ретінде қабылдады. Бұл жаңа саяси мәдениет, мемлекет пен қоғам арасындағы қарым-қатынастың жаңа деңгейі. Сонымен қатар қоғам облыстар мен қалалар деңгейінде қолында айтарлықтай билік шоғырланған әкімдерге де осындай тәсілдерді қолдану туралы әділ талаптарын білдіріп жатыр. Бұл әкімдердің партия филиалдарына жетекшілік етуіне тыйым салу ғана емес, сонымен қатар қызмет атқару мерзіміне партиядан шығуға, сондай-ақ президенттік мерзімнен аз болуы тиіс біржолғы максималды мерзімді анықтауға қатысты, - дейді Ерлік Өмірғали Мәжілісте.
«Ақ жол» фракциясы депутаттары әкімдер де Мемлекет басшысы сияқты өздерінің жақын серіктеріне немесе пікірлестер командасына ғана емес, өз аймағының/қаласының барлық азаматына қызмет етуі керек деп есептейді.
Кез келген сайлауды ұйымдастыруда әкімдердің атқарған рөлін, сондай-ақ облыстар мен қалалар әкімдерінің өткен жылдар бойы билікте «Нұр Отан» партиясының мүшелері болғанын ескере отырып, әкімдердің партиядан шығуы туралы ұсыныстар негізді болып көрінеді және конституциялық реформаның рухына сәйкес келеді деп санаймыз. Сонымен қатар «Жергілікті мемлекеттік басқару және өзін-өзі басқару туралы» заңға сәйкес, әкімдер - президенттің өңірлердегі өкілдері. Заңды коллизия туындайды: өзіне партияға мүше болуға тыйым салынған адамның өкілдері қалай партия мүшесі бола алады? Олардың мәртебесі Президенттен жоғары ма? – деп айтты Мәжіліс депутаты өз сауалында.
«Ақ жол» фракциясы Үкіметке нормаларға бастама жасауды ұсынды:
1) облыстар мен қалалар әкімдерінің сол лауазым қызметінде болған сәтінде, олардың саяси партияларға мүше болуына тыйым салу;
2) облыс пен республикалық маңызы бар қала әкімдерінің жұмысына біржолғы 5 жыл мерзім белгілеу.
