Жетісу облысы Қапал ауылының тұрғыны Нұржанат Ердәулетқызы ерекше өнім шығарып отыр, деп хабарлайды BAQ.KZ.
Ол сүт өнімдері мен балдан сабын әзірлеуді қолға алған. Кәсіпкер өзі тауарын «жасыл өнім» деп атайды. Себебі ондағы қоспалар таза, табиғи.
Атажұртқа Қытайдан 2019 жылы көшіп келген Нұржанат Ердәулетқызы кезінде кәсібін алабота шөбінен қара сабын қайнатып бастағанын айтады. Кейін сұранысқа қарай шығаратын өнім түрін көбейткен. Соның ішінде сүт сабыны, айран сабыны, саумал сабыны, қияр және бал сабындары сияқты түрлерін дайындайтын болды. Негізі бұл кәсіппен айналысуды Қытайда жүргенде бастаған. Кейін елген келген соң ісін қайта жандандырды. Оған отағасының аттан құлап, мертігіп, жұмысқа шыға алмай қалғаны түрткі болыпты. Яғни осы кәсіпті жүргізіп, табыс табуға бел байлаған.
Сабынды дайындауға өзіміздің саумал, сүт, қатығымыз, көкөнісіміз, Текелінің балы қолданылады. Ал қажетті кокос майын Қытайдан алғызамын. Кәсіпті кеңейтуге мемлекет тарапынан берілетін грантқа талпынып көруге ниеттімін. Қазір отбасым барынша қолдау көрсетіп отыр. Екі балам мен келінім өнімді қорапқа салып қаптауға, әлеуметтік желілер арқылы тауар өткізу ісін ілгерілетуге жәрдемін тигізеді, - дейді Н.Ердәулетқызы.
Оның айтуынша, кішкене балалар үшін сабын жүрек, гүл, мысық және басқа да қызықты әрі тартымды формаларда құйылып дайындалады. Мұндай сабынмен нәрестелерді шомылдырса, ешқандай аллергия болмайды. Ересектер қолданса, беттің терісін жұмсартады, жаңа түскен әжімдерді, майлы беттің бөріткендерін, қара дақтарды кетіруге көмектеседі. Яғни кішігірім косметикалық өнім деуге болады. Бағасы сабынның көлемі мен құрамына қарай 500 теңгеден басталады. Дегенмен кәсіпкер беттегі дақтарды медициналық жағынан тексертуді ұмытпау керек дейді. Себебі ол адамның ішкі ағзаларының сырқаты салдарынан ба, әлде сыртқы әсерлерден бе, алдымен соны анықтап алған жөн.
Өзім осы сабынды тұрақты қолданамын. Сырт көзге нәтижесі өз тәжірибемнен айқын көрініп тұр десем де болады. Бұл табиғи таза сабынды алуға Жетісу облысының жақын аудандарымен қатар, Алматыдан да тапсырыстар түсіп жатыр. Бұл ертеден бергі ата-бабаларымыздың сүттен, балдан, шөптерден дайындайтын пайдалы заттарына деген көпшіліктің қызығушылығы әлі күнге зор екенін білдіреді, - дейді кәсіпкер әйел.
Бұл пікірді 15 жылдық тәжірибесі бар педагог, химик-биолог Зарина Абузярова да растайды. Қазір ол Жетісу облысы Алакөл ауданындағы «Лепсі өнімдері» ЖШС-да дайындаушы технолог болып жұмыс істеп, табиғи сабын мен басқа да косметика түрлерін өндіруге өз үлесін қосып келеді.
Еске сала кетсек, «Лепсі өнімдері» ЖШС косметикалық сабын, сусабын, шашқа арналған бальзам, ванна тұзы, жалпы саны 11 түрлі өнім шығарады. Бұл ретте органикалық бал, саумал, жергілікті дәрілік шөптер, оған қоса Алакөлдің шунгиті мен Жалаңашкөлдің топырағы – бәрі де табиғи таза өнім дайындауда таптырмас материал болып отыр. Кәсіпорын жыл басынан бері 10 мың данадай сабын шығарған. Өнімдері жергілікті және астаналық сауда орындарында сатылады.
Сабын дайындаушы шеберлер бұл жақсы бизнес болумен қатар көне дәстүрді жаңғырту, бабалар қолданған тәжірибені тарату деп есептейді.
