Жарты жылда қазақстандықтардан медициналық көмек сапасына 14 мыңнан астам шағым түсті

Қазақстанда 2026 жылдың алғашқы алты айында Медициналық және фармацевтикалық бақылау комитетіне түскен азаматтардың өтініштері 44%-ға артты.

Ең көп шағым мына мәселелер бойынша түскен:

• медициналық көмектің сапасы – 4694 өтініш;
• басқа мемлекеттік органдардың құзыретіне жататын мәселелер – 3026;
• медициналық көмекті ұйымдастыру – 2371.

Шағымдардың ең көп өсуі:

• Маңғыстау облысында – 104%;
• Батыс Қазақстан облысында – 103%;
• Атырау облысында – 93%.

Ал Қарағанды облысында өтініштер саны 16%-ға азайған.

Министрлік кейбір өтініштердің қайталанып түсетінін атап өтті. Мысалы, медициналық куәландыру мәселесі бойынша түскен 700-ге жуық өтініштің 600-і 12 азаматтан келген.

Сонымен қатар:

• өзге мәселелер бойынша – 98%-ға;
• басқа мемлекеттік органдардың құзыретіне қатысты – 61%-ға;
• медициналық этика және деонтология бойынша – 51%-ға;
• медициналық көмекті ұйымдастыру бойынша – 49%-ға;
• медициналық көмектің сапасы бойынша – 40%-ға өтініштер көбейген.

Ал мемлекеттік қызмет көрсету мәселелері бойынша өтініштер 22%-ға төмендеген.

Денсаулық сақтау министрі Ақмарал Әлназарова азаматтардың өтініштерін мұқият талдап, шағымдардың себептерін анықтап, өңірлік денсаулық сақтау басқармаларымен бірлесіп жүйелі мәселелерді шешу жөнінде тапсырма берді.