Жанармай құю станциялары дизель отынына бағаны төмендететін болды

18 Шілде 2021, 13:54
5904
Бөлісу:
Жанармай құю станциялары дизель отынына бағаны төмендететін болды

Алматы, BAQ.KZ. Жанармай құю станциялары монополияға қарсы ведомствоның дизель отынына бағаны төмендету жөніндегі талаптарын орындады. Бұл туралы ҚР Бәсекелестікті қорғау және дамыту агенттігі хабарлады.

Бұған дейін мамыр айынан бастап еліміздің оңтүстігінде дизель отынына бағаның өскені туралы хабарланған болатын.

Осы орайда, Қазақстан Республикасы Бәсекелестікті қорғау және дамыту агенттігі жүргізілген талдау қорытындысы бойынша дизель отыны бағасының өсуі алыпсатарлық сипатқа ие екенін анықтады.

Осыған байланысты, 19 АЖҚС-қа дизель отынына бағаны төмендету арқылы сөз байласу белгілерін жою қажеттілігі туралы хабарлама жіберілді. Хабарламаны орындау мерзімі оны алған күннен бастап күнтізбелік 30 күнді құрайды. Хабарламаны орындамау монополияға қарсы тергеу жүргізуге негіз болады,-делінген хабарламада.
Бұл хабарламаларды нарық субъектілерінің көпшілігі мерзімінен бұрын орындады және бағаны төмендетуге дайын екендіктерін хабарлады.

Нұр-Сұлтан, Алматы, Шымкент қалалары мен Қызылорда, Жамбыл, Түркістан, Алматы облыстарында әр литр бағасы 2-ден 5 теңгеге дейін төмендетілді. Сондай-ақ, Qazaq Oil, Gas Energy бағаның оңтүстікте ғана емес, еліміздің басқа да бірқатар өңірлерінде төмендегені туралы хабарлады. Ал Гелиос және Sinooil-ға жіберілген хабарламаларды орындау мерзімі әлі бар,-делінген хабаралмада.

Сонымен қатар осы жылдың 1 шілдесінен бастап дизель отынына акциз бағасы тоннасына 540 теңгеден 9 мың 300 теңгеге дейін көтерілгенін атап өту қажет, бұл фактор кейін бағаға әсер етуі мүмкін.

Бағалық сөз байласуға және ЖЖМ бағасының негізсіз өсуіне жол бермеу мәселесі Агенттіктің тұрақты бақылауында.

Өзгелердің жаңалығы