Үздік білім беру ұйымдарының басшылары «Болашақ» бағдарламасы бойынша 3-6 айлық курсқа шетелдерде тағылымдамадан өтеді, деп хабарлайды BAQ.KZ.
Мемлекет басшысының тапсырмасы бойынша ҚР Оқу-ағарту министрлігі Президенттік жастар кадрлық резервінің үлгісі бойынша білім берудегі өзгерістер көшбасшыларын іріктеу және даярлау механизмін бекітті.
«Білім берудегі өзгерістердің 1000 көшбасшысы» пилоттық жобасы аясында 220 талапкер соңғы іріктеу кезеңдерінен өтуде. Осылайша, 2024 жылдан бастап жаңа форматтағы басшылардың кадрлық резерві жыл сайын толықтырылатын болады. Колледждердегі менеджмент жүйесін жетілдіру бойынша осындай кадрлық резервті қалыптастыру жұмыстары орта кәсіптік және техникалық білім беру ұйымдарында да жүргізілетін болады.
Сондай-ақ үздік білім беру ұйымдарының басшыларын «Болашақ» бағдарламасы бойынша 3-6 айлық курсқа шетелдерде тағылымдамадан өтуге жіберу жұмыстары жалғасады. Қазір 200-ден астам педагог «Болашақ» бағдарламасы аясында «Білім» және «Педагогика» бағыттары бойынша шетелдерде тағылымдамадан өтуде, - делінген хабарламада.
Бұдан басқа, бірінші басшылардың кәсіби әлеуетін тиімді пайдалану мақсатында 1000-ға жуық балабақша меңгерушілері, мектеп, колледж директорлары ротацияланды.
