Нұр-Сұлтан, BAQ.KZ. Наурыз айында жүргізілген сауалнама қорытындысы бойынша халықтың инфляциялық күтулері 0,2%-ға өсті, деп хабарлады Ұлттық банктің баспасөз қызметі.
Алдағы 12 ай ішінде бағаның қазіргі өсу қарқынының сақталуын немесе оның әлдеқайда көтеріле түсетінін күтетін респонденттердің үлесі 44%-ға дейін артты.
Инфляцияны бағалауда бағаның өте жоғары болатынын атап өткен респонденттердің үлесі 46%-ға дейін төмендеді.
Әдеттегідей, сауалнамаға қатысқандардың басым көпшілігі (88%) азық-түлік бағасының өсетінін айтады.
Сонымен бірге азық-түлікке жатпайтын тауарлар бағасының көтеріледі деп белгілеген респонденттердің үлесі артты: 2021 жылдың ақпан айындағы 3,3%-дан наурызда 4,5%-ға дейін және қызметтерге – 2,5%-дан 3,4%-ға дейін, - делінген хабарламада.
Қазіргі қаржылық жағдайды бағалау – теріс аймақта сақталып отыр. Наурызда пессимистік жауаптардың үлесі ақпандағы 35,5%-дан 36,2%-ға дейін өсті.
Болашақ қаржылық жағдайға қатысты оң күтулер басым, наурыз айында олар 38%-ға дейін өсті (ақпанда - 37%). Халықтың көлемдеп сатып алуға дайындығы өткен аймен салыстырғанда оң бағалардың өсуі есебінен біршама жақсарды: ақпан айындағы 13%-дан наурыз айында 15%-ға дейін.
2021 жылдың наурыз айында экономиканың дамуы бойынша қысқа мерзімді және ұзақ мерзімді күтулер екінші ай қатарынан нашарлай түсті. Дегенмен оң аймақта қалып отыр.
