Қытайдың АҚШ-қа тауар экспорты өткен жылмен салыстырғанда 20%-дан астам төмендеді. АҚШ президенті Дональд Трамп әлемнің екі ірі экономикасы арасындағы сауда соғысын бәсеңдетуге мүдделі екенін көрсету үшін Қытайдан келетін тауарларға баж салығын 80 пайызға дейін төмендетуге рұқсат берді, деп хабарлайды BAQ.KZ.
Қытайға 80% тариф әділ болып көрінеді, - деп жазды Трамп Truth Social сайтында.
2025 жылдың сәуір айындағы жағдай бойынша Қытайдың Америка Құрама Штаттарына тауар экспорты өткен жылмен салыстырғанда 20%-дан астам төмендеді. Бұл ретте өткен айда Қытайдан экспорттың жалпы көлемі 8,1%-ға өсті.
Қаңтардан бері президент Дональд Трамп Қытай тауарларына 145%-ға дейінгі жаңа импорттық баж салығын енгізді, бұл қаржы нарықтарын дүр сілкіндіріп, екі ел арасындағы сауданың күрт төмендеуіне әкелді. Пекин АҚШ-тың кейбір тауарларына 125% баж салығын енгізу арқылы жауап берді.
Бұған дейін АҚШ пен Қытай шенеуніктері сауда соғысын жеңілдету мақсатында осы аптада келіссөздерді бастауға ниетті екені хабарланған болатын. Тараптар өкілдерінің кездесуі Швейцарияда өтеді. Қытай тарапынан ҚХР Мемлекеттік кеңесінің вице-премьері Хэ Лифэн, ал Вашингтон тарапынан отырысқа АҚШ Қаржы министрі Скотт Бессент пен АҚШ Сауда өкілі Джемисон Грир қатысады.
Қытай Сыртқы істер министрінің орынбасары Хуа Чуньин кездесу алдында Пекиннің Америка Құрама Штаттарымен сауда мәселелерін шешу мүмкіндігіне толық сенімді екенін айтты.
Сонымен бірге АҚШ елдер арасындағы келіспеушіліктер жақын арада шешілмейді деп есептейді. АҚШ-тың бұрынғы сауда жөніндегі келіссөзшісі Стивен Олсон кездесуден туындайтын кез келген тарифтерді төмендету шағын болуы мүмкін деп болжайды.
