Тоқаев ҚХР Мемлекеттік кеңесі премьерінің орынбасарын қабылдады

16 Мамыр 2019, 15:34
1486
Бөлісу:
Тоқаев ҚХР Мемлекеттік кеңесі премьерінің орынбасарын қабылдады

Нұр-Сұлтан, BAQ.KZ. Қазақстан Президенті Қасым-Жомарт Тоқаев Қытай Халық Республикасының Мемлекеттік кеңесі премьерінің орынбасары Хань Чжэнді қабылдады. Бұл туралы Ақорданың баспасөз қызметінен хабарлады.

Мемлекет басшысы Хань Чжэннің Қазақстанға сапары екіжақты сауда-экономикалық қатынастарды нығайтуға септігін тигізетініне сенім білдірді.

Қазақстан Президенті Хань Чжэнді «Бір белдеу, бір жол» форумының табысты өтуімен құттықтап, Си Цзиньпиннің Ұлы Жібек жолын жаңғырту идеясы халықаралық қоғамдастық тарапынан қолдау тапқанын және өзінің өміршеңдігін дәлелдегенін атап өтті.

Қасым-Жомарт Тоқаев Елбасы Нұрсұлтан Назарбаев пен ҚХР Төрағасының жақында өткен кездесуінде қол жеткізген уағдаластықтар екі ел арасындағы жан-жақты стратегиялық серіктестікті нығайту жолындағы маңызды қадам болғанын айтты.

«Қытаймен тату қарым-қатынас орнату Қазақстанның сыртқы саясатындағы ең маңызды басымдықтардың бірі. Екі ел арасындағы саяси, сауда-экономикалық және мәдени-гуманитарлық байланыстар өзара пайдалы әрі тиімді мемлекетаралық ықпалдастықтың үлгісін көрсетеді. Қытай – Қазақстанның ірі сыртқы сауда әріптесі. Екіжақты сауда-саттықтың ауқымы қарқынды өсіп келеді», – деді Мемлекет басшысы.

ҚХР Мемлекеттік кеңесі Премьерінің орынбасары Қазақстанға алғаш рет сапармен келгенін атап өтіп, біздің еліміздің жақсы әсер қалдырғанын айтты. 

«Қазақстан тәуелсіздік жылдары тұрақты дамып келеді. Ел экономикасы өсуде. Өзара қарым-қатынастарымыздың дамығанына ризашылық білдіреміз», – деді Хань Чжэн.

Кездесу барысында Қазақстан-Қытай бірлескен жобаларын жүзеге асыру, Қазақстан ауыл шаруашылығының органикалық өнімдері экспортының  көлемін арттыру, трансшекаралық өзендерді пайдалану және туризмді дамыту мәселелері қарастырылды.

Көлік-логистикалық саладағы ынтымақтастыққа ерекше көңіл бөлінді. Соның ішінде, Ляньюньган портындағы бірлескен терминалдың және арнайы экономикалық аймақтағы «Қорғас – Шығыс қақпасы» құрғақ портының әлеуетін пайдалану, транзитті контейнерлердің тасымал көлемін арттыру  перспективалары талқыланды.


Өзгелердің жаңалығы