Тау-кен өндіру және металлургия салаларында қандай «жасыл» технологиялар енгізіліп жатқаны, ESG принциптері қаншалықты тиімді қолданылатыны және өнеркәсіптік компаниялар қоршаған ортаға теріс әсерді азайту үшін қандай қадамдар жасалып жатқаны туралы сарапшылар «Металдар мен қорытпалар» халықаралық конференциясында айтты, деп хабарлайды BAQ.KZ тілшісі.
Отырыста сөз сөйлеген спикерлердің бірі, отандық «Полиметалл Евразия» кәсіпорнының орнықты даму жөніндегі директоры Диляра Еденбаевадан өнеркәсіптік сектор компанияларында орнықты даму қағидаттарын енгізу қажеттігі және ықтимал тәуекелдері туралы сұраған едік.
- Диляра Тілеужанқызы, ESG дегеніміз не және оның өнеркәсіп саласымен қандай байланысы бар?
- ESG аббревиатурасы үш компонентті қамтиды: экология, әлеуметтік жауапкершілік, корпоративтік басқару. Бүгінгі таңда ESG қағидаттары БҰҰ қабылдаған 17 тұрақты даму мақсатына негізделген. Бұл денсаулық пен әл-ауқат, гендерлік теңдік, ұтымды тұтыну және өндіріс және тағы басқалар. ESG тақырыбы Тау-кен металлургия саласы үшін және жалпы Қазақстан үшін өзекті болып отыр. Климаттың өзгеруі, әлеуметтік жауапкершілік мәселелері бар екені рас. Бүгінде өнеркәсіптік сектор тұрақты даму, ашықтық және экологиялық көрсеткіштерді жақсарту мәселелерінде нақты ұстанымға ие болуы қажет. Сондықтан компаниялар ESG принциптерін енгізуге назар аударуы керек.
- Конференцияда сіз өндіріс тиімділігін арттырудың табысты тәжірибелерімен және қолданылатын инновациялық технологиялармен бөлістіңіз, олардың ішінде компаниядағы ішкі су айналымы, қалдық қоймаларын басқару, декарбонизациялау жобалары бар. Соңғысына тоқталып өтсек, бұл мәселені шешуде өнеркәсіп саласы қандай бастамаларды қолға алуда?Мысалдар келтіре аласызба?
Декарбонизация-бұл біртұтас жобалармен шектелмейтін кешенді процесс, бұл компанияның тұрақты даму тұжырымдамасына және оның стратегиясына енгізілген процесс. Өнеркәсіпті декарбонизациялау міндетін кешенді тәсілсіз шешу мүмкін емес, атап айтқанда:
- көміртегі ізін егжей-тегжейлі есептеу;
- активтердің көміртегі профилін талдау;
- шығарындыларды азайту мүмкіндіктерін іздеу;
- стратегия құру және нақты жобаларды әзірлеу қажет.
Біздің орта мерзімді мақсатымыз - 2030 жылға қарай шығарындылардың қарқындылығын 30% төмендету. Бізді алға қойған мақсаттарға жетуге жетелейтін негізгі жобалардың бірі-жаңартылатын энергия көздерін (ЖЭК) салу. Осы жылдың жазында Polymetal Қазақстанның Энергетика министрлігімен кәсіпорындардың жанама шығарындыларын 40% - ға төмендетуге мүмкіндік беретін екі күн электр станциясын салу туралы келісімге қол қойды. Тағы бір маңызды аспект-СО2 сіңіру. Осы бағытта біз 2000 гектарға жуық орман екпелерін қамтитын орманды қалпына келтіру жобасын қарастыра бастадық.
- Жалпы ESG принциптерін ұстану не береді ?
ESG принциптерін ұстану компанияларға ерекше имидж мен күшті бренд береді. Бүгінгі таңда адам, өмір сапасы және еңбек жағдайлары бірінші орынға шығады. Заманауи жасыл технологиялар өнімділікке және қажетті қаржылық көрсеткіштерге қол жеткізуге ықпал етеді. Сондай-ақ, инвестициялық тартымдылық туралы ұмытпаңыз. ESG-инвестициялау да өзін дәлелдеді-инвестициялар туралы шешім компанияның қоғамның дамуына қосқан үлесі негізінде қабылданады. Ірі инвестициялық қорлардың шамамен 40%-ы қаржылық көрсеткіштермен қатар болашақ инвестицияларды бағалау кезінде ESG факторларын ескереді.
Әлемдік тәжірибе көрсеткендей, ESG стратегиясының сәйкессіздігі ақша айналымына кері әсер етеді. Бизнестің дәстүрлі түрлері өндірісті жаңарту, сауатты құрылған әлеуметтік саясат құру және ашық корпоративтік басқару қажеттілігін түсінеді.
Қазірдің өзінде бизнесті ESG критерийлері бойынша бағалайтын 400-ге жуық рейтингтік агенттіктер бар. Компанияның осындай рейтингтерге енуі оны қоғамдағы даму мен қабылдаудың жаңа деңгейіне шығарады.
-Сұхбатыңызға рахмет!
