Нұр-Сұлтан, BAQ.KZ. Медициналық кадрлардың жетіспеушілігі Жамбыл өңірі үшін де, әсіресе ауылдық жерлерде маңызды болып отыр. Облыс басшылығы С.Асфендияров атындағы Қазақ ұлттық медицина университетімен бірлесіп, жоғары деңгейлі кадрларды даярлаудың өзіндік жүйесін жолға қоя отырып, аталған мәселені түбегейлі шешуді жоспарлауда.
Жамбыл облысы әкімдігінің баспасөз қызметінің мәліметінше дүйсенбі күні облыс әкімі Бердібек Сапарбаев пен ҚазҰМУ ректоры Талғат Нұрғожин Тараз қаласындағы Жамбыл жоғары медициналық колледжінің базасында аталған университеттің филиалын ашты.Бастапқы кезде шамамен 100 адам оқуды бастауда десек, резиденттерді белсенді түрде тарту көзделген.
Колледж директоры Жәмила Сарыбекова қонақтарға пәндік кабинеттерді аралатып, телестудия, мұражай, кітапхана және мемлекет электрондық қызметтерді ұсынуға арналған ғимараттарды таныстырды. Өңір басшысы мүгедектігі бар студенттердің білім алуына жасалған жағдайдың, инклюзивті білім беруді дамыту мен түлектердің жұмысқа орналасу мүмкіндігіне көңіл бөлді.
Жәмила Сарыбекованың айтуынша, колледжде инклюзивті топ құрылған. Түлектерді жұмысқа орналастыру үшін облыстағы 41 денсаулық сақтау мекемесімен ынтымақтастық туралы келісімшарттар жасалған.
Колледж ұжымымен кездесуде Бердібек Сапарбаев пандемия жағдайында денсаулық сақтау саласын мемлекеттік қолдау айтарлықтай артқанын атап өтті.
Пандемия біздің бұрыннан келе жатқан мәселелерімізді, бірінші кезекте саладағы кадрлардың тапшылығын көрсетіп берді. Бүгінгі күні шамамен 250 бос жұмыс орны бар. Мәселе жүйелі түрде шешілуі керек. Осыны ескеріп біз қыркүйек айында С.Асфендияров атындағы Қазақ ұлттық медициналық университетімен ынтымақтастық орнатып, тиісті меморандум жасадық. ЖОО-ның тәжірибелі дәрігерлері шалғай аудандардағы жергілікті медициналық қызметкерлерге көмектесіп, тәжірибелерімен бөліседі. Бұл тәжірибелі дәрігерлермен, профессорлармен қоян-қолтық жұмыс істеп, тәжірибесін меңгеруге, ғылымды дамытуға тамаша мүмкіндік, - деп атап өтті аймақ басшысы.
Талғат Нұрғожиннің айтуынша, ынтымақтастық барлық тараптарға тиімді. Университет колледж оқытушылары үшін докторантурада оқуды ұйымдастыруға, оқу процесіне жаңа технологияларды енгізуге қабілетті. Жапония және басқа да дамыған елдердің жоғары оқу орындарымен тығыз байланыс орната отырып, жамбылдық оқытушылар мен дәрігерлердің біліктілігін арттыру үшін сол жаққа жіберуге болады.
Жұмыс жолға қойыла келе басқа да мүмкіндіктер ашылатын болады, - деп түйіндеді Талғат Нұрғожин.
Өңір басшысы төрт компьютерлік аппарат пен екі магнитті-резонанстық томография, ангиографтар және басқа заманауи жабдықтар сатып алу жоспарлары туралы қысқаша айтып өтті. Бердібек Сапарбаев мұндай қондырғылар әрбір ауданда болуы керектігін алға тартты.
