Талдықорғанда перинаталдық орталықтың базасында ұрықты сақтау орталығы ашылды, деп хабарлайды BAQ.KZ.
Ұрықтың туа біткен даму кемістігі бар балалардың тууын, балалардың арасында сырқаттанушылық пен мүгедектікті уақтылы диагностикалау және алдын алу мақсатында Қазақстан Республикасында облыстық перинаталдық орталықтың базасында Жетісу облысы бойынша ұрықты сақтау орталығы ашылды.
Орталықта жүкті әйелдерге ультрадыбыстық және биохимиялық скрининг жүргізіледі, оған генетиктер мен акушер-гинекологтар консультация береді. Пренаталдық консилиумда ұрықтың даму патологиясы анықталған кезде босану тәсілі анықталады. Сондай-ақ, орталықта ұрықтың анықталған патологиясын растау үшін ультрадыбыстық диагностиканың екінші деңгейі бар.
Жетісу облысының денсаулық сақтау басқармасы басшысының орынбасары Әйгерім Бауыржанқызы Лебаева бөлімшелер ультрадыбыстық және биохимиялық скринингті қамтитын біріктірілген генетикалық скрининг жүргізу үшін қажетті жабдықтармен жарақталғанын атап өтті.
Орталықтың негізгі бағыты туа біткен патологиялармен күресу, ұрықтың қалыптасуына әсер ететін жағымсыз факторларды жою, туа біткен ақаулар мен хромосомалық ауытқуларды анықтау кезінде жүктілікті ұзарту мәселесі, жаңа туған нәрестеге қажетті медициналық көмекті уақтылы көрсету болып табылады. Генетика бөлімінде хромосомалық ауытқуларға пренаталдық биохимиялық скрининг және тұқым қуалайтын метаболикалық ауруларға неонаталдық скрининг жүргізіледі, - деді Әйгерім Лебаева.
Анықталған туа біткен патологиялармен жүктілікті одан әрі жүргізу немесе тоқтату тәсілі туралы мәселелерді шешу үшін ұрық патологиясының сипатына байланысты бейінді мамандарды тарта отырып, көп бейінді комиссия ұйымдастырылды. Комиссияның отырысында отбасына анықталған аурудың барлық салдары, жүктілікті ұзарту туралы шешім қабылдаған кезде баланың өміріне болжам және мүгедектік дәрежесі түсіндіріледі.
Болашақта ұрықты сақтау орталығында ұрықтың инвазивтік пренаталдық диагностикасын жүргізу жоспарлануда, бұл «Хромосомалық патология» диагнозының соңғы кезеңі болып табылады.
