"Су тасқыны қаупі сақталып отыр" - Премьер-министр

14 Мамыр 2024, 11:00
374
Бөлісу:
"Су тасқыны қаупі сақталып отыр" - Премьер-министр
Фото: Үкімет баспасөз қызметі

Премьер-министр Олжас Бектенов еліміздің елді мекендерінде су басу қаупі сақталып отырғанын айтты, деп хабарлайды BAQ.KZ тілшісі.

Отырысымызды алдымен, су тасқынына байланысты жағдайдан бастаймыз. Көріп отырғанымыздай, Атырау облысында елді мекендерді су басып қалу қаупі сақталып отыр. Сондықтан тиісті құрылымдар тасқынға қарсы жұмыстарды жалғастыруы қажет. Әсіресе, Индербор және Махамбет елді мекендеріндегі жағдайды ерекше бақылауға алу керек. Онда Жайық өзені қауіпті деңгейден асып кетті. Эвакуациялық бекеттер кез келген уақытта адамдарды қабылдауға дайын болуға тиіс, - деді үкімет басшысы.

Бектенов күштер мен құралдар да сақадай сай тұруы керегін айтты.

Су ресурстары министрлігі мен Атырау облысының әкімдігі Жайық өзеніндегі су деңгейіне тұрақты мониторинг жүргізуді қамтамасыз етсін. Сонымен қатар Ақтөбе облысында 2 елді мекенде әлі күнге дейін көлік қатынасы жоқ. Онда азық-түлік пен дәрі-дәрмектердің болуын мұқият бақылауға алу керек. Электр жарығынсыз отырған ауылдар да бар. Жөндеу жұмыстарын тездету керек.Сондай-ақ су тасқыны жағдайы тұрақталған өңірлерде әкімдіктер бағалау және жобалау жұмыстарын күшейтуге тиіс. Келтірілген залалды өтеу, оның ішінде үйлер мен инфрақұрылымды қалпына келтіру жөніндегі барлық шаралар белгіленген мерзімде іске асырылуы қажет. Біз зардап шеккен тұрғындардың мүмкіндігінше тезірек қалыпты өмірге қайта оралуын қамтамасыз етуіміз керек, - деді Бектенов үкімет отырсында.

Өзгелердің жаңалығы