Нұр-Сұлтан, BAQ.KZ. Шымкентте Байтұрсынов, Түркістан, Қонаев, Арғынбеков, Асқаров, Жангельдин, Иляев сынды үлкен магистралды көшелерге салынып жатқан веложолақтардың құрылысы кезең-кезеңімен аяқталуда.
Бүгіннен бастап Shymkent bike велостанциясы қайта іске қосылды. Бұл туралы Шымкент қаласы әкімінің орынбасары Мақсұт Исахов әлеуметтік парақшасында мәлім етті.Қазіргі таңда жобада 160 велосипедтен құралған 40 велостанция қамтылған. Бүгіннен бастап карталар сатылымға шығады. Карталарды Тәуке хан көшесіндегі Имран супермаркеті жанындағы сату бөлімінен алуға болады, – дейді Мақсұт Исахов.
Пайдаланушылар үшін қолжетімді әрі ыңғайлы тарифтік жоспарлар да әзірленген. Вike sharing жүйесі арқылы велосипедті алғашқы 30 минут тегін пайдаланып, одан кейін тарифке сәйкес 1 сағат үшін -100 теңге, 2 сағат үшін – 250 теңге, 3 сағат үшін – 500 теңге, ал 3 сағаттан асса 1 000 теңгеден жұмсалады. Жалпы абоненттік төлем картасының құны: 1 айлық абонемент – 2 500 теңге, 3 айлық абонемент – 6 000, 1 жылдық абонемент – 10 000 теңге тұрады.
