Нұр-Сұлтан, BAQ.KZ. Шымкент қаласында жыл соңына дейін 368 отбасы баспанамен қамтылады. Бұл туралы Шымкент қаласының тұрғын үй басқармасының басшысы Азамат Рысжанов қала әкімдігінің Instagram және Facebook парақшасында өткен тікелей эфирде мәлімдеді.
Басқарма басшысы алдымен тұрғын үй кезегі және оның жылжуы жайында баяндады. Содан соң тұрғын үй мәселесіне қатысты азаматтар тарапынан қойылған бірқатар сұрақтарға жауап берді.Бір сағатқа созылған тікелей эфир кезінде Азамат Рысжанов тұрғын үйге мұқтаж азаматтар кезегінде тұрған азаматтарға мемлекеттік тұрғын үй қорынан жалдамалы пәтер белгіленген тәртіппен кезек ретімен берілетіндігін жеткізді. Сондай ақ тұрғын үй кезегінің жылжуы толығымен автоматтандырылғандығын оған ешқандай адами фактор әсер ете алмайтындығын атап өтті. Бұдан бөлек несиелік бағыттағы бағдарламаларға да тоқталды.
Шымкент қаласы республика бойынша тұрғын үй құрылысы қарқынды жүріп жатқан аймақтар қатарында. Ағымдағы жылы 976 отбасыны арендалық пәтермен қамту жоспарланған. Бүгінгі таңда құрылыс басқармасы тарапынан 696 пәтер пайдалануға тапсырылып, оның ішінде 300 пәтері жұмыс істейтін жастарға ағымдағы жылдың 1 тоқсанында табыс етілді. 308 пәтер бойынша тұрғын үй комиссияның шешімі қабылданып, жалдау шарттарын беру толығымен аяқталып, азаматтарға кезек реті бойынша берілді. Ал жыл соңына дейін 368 отбасы жаладамалы баспанаға қол жеткізеді, – деді Азамат Рысжанов.Айта кету керек, Шымкент қаласы бойынша тұрғын үй алу тізімінде 44 940 азамат тіркелген. Жыл басынан бері «Нұрлы жер» мемлекеттік бағдарламасының несиелік бағыттары бойынша 1299 азамат өз баспанасына қол жеткізді. Оның 286-сы тұрғын үй кезегінде тіркелгендер.
