Швецияның Қазақстандағы елшісі II дәрежелі «Достық» орденімен марапатталды

29 Қараша 2022, 20:25
896
Бөлісу:
Швецияның Қазақстандағы елшісі II дәрежелі «Достық» орденімен марапатталды

Қазақстан Республикасы Сыртқы істер министрінің орынбасары Роман Василенко еліміздегі дипломатиялық миссиясының аяқталуына байланысты Швеция Корольдігінің Қазақстандағы Елшісі Матс Фойерді қабылдады, деп хабарлайды BAQ.KZ.

Р. Василенко швед диломатына Астанадағы жасаған қызметі кезінде Қазақстан-Швеция ынтымақтастығын одан әрі тереңдетудегі белсенді күш-жігері үшін алғыс білдіріп, ҚР Президенті Қасым-Жомарт Тоқаевтың тапсырмасы мен Жарлығына сәйкес, елшіге жоғары награда – II дәрежелі «Достық» орденін табыс етті.

М. Фойердің Астана мен Стокгольм арасындағы саяси және сауда-экономикалық ынтымақтастықты кеңейтіп нығайтуға және екі ел халықтарының жақындасуына қосқан елеулі үлесіне назар аударылды. Елші Қазақстан мен Швецияның сарапшылар қоғамдастықтары арасында экология саласында тәжірибе және білім алмасуды қамтамасыз етуге де айтарлықтай күш салды.

Өз кезегінде, М. Фойер өз еңбегіне жоғары баға бергені үшін ҚР Президентіне шын жүректен ризашылығын білдіріп, елімізде өткізген бес жыл ішінде байқаған қазақстандықтардың қонақжайлылығы мен достығын мәңгі есінде сақтайтынын  атап өтті.

Швеция елшісінің пікірінше, елдеріміз арасында тұрақты және экологиялық жауапты экономикалық өсу саласындағы ынтымақтастықты одан әрі нығайтудың маңыздылығы жаһандық жылынуға ұшыраған қазіргі әлемде артып келеді.

Өзгелердің жаңалығы