ШҚО-да орта есеппен алғанда коммуналдық желілердің 76,19 пайызы тозған. Атап айтқанда, ең қатты тозған - электр желілері екені анықталды, деп хабарлайды BAQ.KZ.
Бұл туралы ҚР ҰЭМ Табиғи монополияларды реттеу комитетінің ШҚО бойынша департаментінің басшысы Арман Мәлік айтып берді. Бұл туралы Altaynews жазды.
Коммуналдық желілердің тозуы жалпы елімізде өз шешімін таппай келе жатқан мәселелердің бірі болып отыр. Қыстың қақ ортасында Екібастұз, Риддер қалаларының жылусыз қалуы осы мәселенің бірден бір айғағы екенін көрсетті.
ШҚО бойынша коммуналдық желілердің тозуы орта есеппен 76,19 пайызды құрайды. Атап айтқанда, электр желісінің – 97 пайызы, жылумен жабдықтау желілерінде – 64 пайыздан астам, сумен жабдықтау желілерінің – 62 пайыздан астам және су бұру желілерінің – шамамен 81 пайызы тозған. Бұл ұсынылатын коммуналдық қызметтердің сапасы мен сенімділігіне тікелей әсер етеді, - дейді Арман Мәлік.
Мемлекет басшысы үкіметтің кеңейтілген отырысында еліміздегі ЖЭС-тердің орташа тозу деңгейі 66 пайызға, ал кейбір қалаларда шекті межеден асып, 80 пайызға жеткенін атап өтті. Сондай-ақ жалпы еліміз бойынша электрмен жабдықтау желілерінің үштен екісі, жылу коммуникацияларының 57 пайызы және су құбыры желілерінің жартысына жуығы тозған көрінеді. Сондықтан мемлекет басшысы желілер мен қуаттардың тозу көрсеткіштерін кезең-кезеңімен 15 пайызға азайтуға тапсырма берді.
Естеріңізге сала кетейік, бұған дейін энергетика министрлігі 37 жылу электр орталықтарының техникалық жай-күйіне талдау жүргізіп, қызыл аймаққа кіретін 19 жылу электр орталықтарын анықтағанын хабарлағанбыз. ШҚО бойынша Өскемен мен Риддердегі жылу электр орталықтары да тәуекел аймағына кіретіні белгілі болды.
