Семейдегі жедел жәрдем ауруханасына қала тұрғыны инсульт белгілерімен түскен. Оған шұғыл түрде жоғары технологиялық эндоваскулярлық тәсілмен нейрохирургиялық ота жасалды, деп хабарлайды BAQ.KZ.
Артерияның кішкене тесігі арқылы жіңішке өткізгіш енгізіп, тамырлар арқылы аневризмаға жетіп, арнайы микроспиральдармен толтырдық. Осылайша, біз қан айналымынан аневризманы өшірдік: қан енді оған енбейді, бұл оның одан әрі өсуі мен қайта қан кетуін болдырмайды. Операция сәтті өтіп, науқас қалыпты өміріне оралды, — дейді маман.
Нейрохирург Төлеуғали Қойшыбаевтың айтуынша, жоғары технологиялық инвазивтік емес әдіспен ми аневризмасына мұндай операция тәулік бойы жүйелі түрде жүргізіледі және бұл медициналық көмек МӘМС аясында қолжетімді.
Мысалы, мұндай отаның сомасы шамамен 5 млн теңгеден асады, сақтандырылған адамдар үшін медициналық қызметтерге төлем Әлеуметтік медициналық сақтандыру қорының активтері есебінен жүзеге асырылады.
Айтпақшы, өткен жылы және биылғы жылдың алғашқы айында қаладағы жедел медициналық көмек ауруханасының нейрохирургия бөлімінде ми тамырларын эмболизациялау бойынша 90-ға жуық жоғары технологиялық ота жасалған.
Айта кетерлік жайт, Семей қаласының Жедел медициналық көмек ауруханасы – қаладағы ең ірі жедел жәрдем ауруханаларының бірі. Науқастарды емдеуде және оңалтуда ең заманауи технологиялар, қарқынды терапияның озық тәсілдері, консервативті және эндоваскулярлық диагностика мен емдеу әдістері қолданылады.
