Ақтауға жұмыс сапары барысында Ғылым және жоғары білім министрі Саясат Нұрбек XII жазғы универсиада боксынан жарысқа қатысты, деп хабарлайды BAQ.KZ.
Жарыс басталар алдында сөз сөйлеген министр Саясат Нұрбек Мемлекет басшысының тапсырмасы бойынша Үкімет бұқаралық спортты дамыту және студент жастарды республикалық және халықаралық деңгейдегі спорттық іс-шараларға тарту үшін барынша мүмкіндіктер жасайтынын атап өтті. Ол сондай-ақ спортшыларды жеңіспен құттықтап, ұйымдастырушыларға Универсиаданың жоғары деңгейде өткізіліп жатқаны үшін алғысын білдірді.
Универсиада қазақстандық жоғары оқу орындарының мыңдаған жас студент-спортшыларын біріктірді. Бұл еліміздің спорттық өміріндегі маңызды іс-шаралардың бірі. Универсиадада сәтті өнер көрсету сізге Қытайдағы Дүниежүзілік жазғы Универсиадаға және күзде Түркістанда өтетін Түркі Универсиадасына қатысуға мүмкіндік береді, - деді Саясат Нұрбек.
Естеріңізге сала кетейік, XII Жазғы Универсиада Ақтау қаласында 24 мамыр мен 24 маусым аралығында өтуде. Оған спорттың 17 негізгі түрі бойынша қазақстандық жоғары оқу орындарының студенттері қатысып жатыр.
Универсиада жеңімпаздары 28 шілде мен 8 тамыз аралығында Қытайда өтетін XXXI Дүниежүзілік жазғы Универсиадаға және 24-29 қыркүйекте Түркістанда өтетін II-ші түркі Универсиадасына қатысуға жолдама алады.
