Ресейде маймыл шешегі қайта тіркелді
Бір айда бір ауруханада үш жағдай анықталған.
Мақпал ОРЫНБЕК
2 Қараша 2026, 12:06
Ресейде тағы да маймыл шешегін жұқтыру дерегі тіркелді. Шетелден оралған 38 жастағы Ресей азаматы Домодедово ауруханасының жұқпалы аурулар бөліміне жатқызылды. Оған маймыл шешегі диагнозы қойылған. Бұл іске Роспотребнадзор қызметкерлері де тартылды. Бұл туралы жергілікті «База» басылымы хабарлады.
Журналистердің мәліметінше, сапардан оралғаннан кейін ресейліктің дене қызуы көтеріліп, лимфа түйіндері қабынып, денесінде бөртпе пайда болған. Зертханалық талдаулар инфекцияны растады. Қазір дәрігерлер науқастың жағдайын тұрақты деп бағалап отыр.
Домодедово ауруханасында соңғы 30 күнде маймыл шешегінің бұл үшінші тіркелген жағдайы болып отыр. Қазір Роспотребнадзор мамандары инфекцияның таралу тізбегін анықтап, науқастың елге оралғаннан кейін кімдермен байланыста болғанын тексеріп жатыр.
Еске салайық, 17 қазанда Санкт-Петербургте маймыл шешегіне күдікпен бес Ресей азаматының ауруханаға жатқызылғаны белгілі болды. Ал үш күннен кейін олардың барлығынан маймыл шешегі анықталғаны расталды.
Ең оқылған:
- Қазақстандықтар 2027 жылғы Жаңа жылда төрт күн қатарынан демалады
- Дастан Сәтбаев жарақатына байланысты «Бернли» сапынан тағы да шығып қалды
- Астанада 5–7 қараша күндері көлік қозғалысы шектеледі
- Астанада көлігіне балағат сөз жазған жүргізуші 10 тәулікке қамалды
- Конгода әлемді алаңдатқан індеттен 5 мыңнан астам адам қайтыс болды