Нұр-Сұлтан, BAQ.KZ. Қазпошта тарифтерді төмендетті. Бұл туралы "Қазпошта" АҚ баспасөз қызметі хабарлады.
Қазпошта халық арасындағы ең көп сұранысқа ие қызметтердің тарифтерін – салмағы 2 кг-ға дейінгі сәлемдемесі бар пошта жөнелтілімдерін жеке тұлғаларға жеткізу қызметінің тарифін өзіндік құны деңгейіне дейін төмендетті.
Қазпошта басшылығы ҚР Президенті Қасым-Жомарт Тоқаевтың тапсырмасына сәйкес, осы жылға бекітілген тарифтерді төмендету туралы шешім қабылдады. Бұдан былай салмағы 0,5 кг-ға дейінгі сәлемдемені Қазақстан бойынша жер үсті көлігімен жіберу құны – 900 теңгенің орнына 857 теңге, салмағы 1 кг-ға дейін – 1000 теңгенің орнына 900 теңге, 2 кг-ға дейін – 1200 теңгенің орнына 1130 теңге болды. Төмендетілген тарифтер 2022 жылғы 1-жартыжылдық ішінде қолданылады, - делінген хабарламада.
Сондай-ақ Қазпошта 2021 жылдың соңында 2022 жылға арналған тарифтерді арттыру жағына қайта қарастырғанын атап өтті. Аталған шешімге төменде келтірілген объективті факторлар әсер еткен.
Біріншіден, бүгінде Ұлттық пошта операторы 3000 астам залалды ауылдық пошта бөлімшелерін ұстау, газеттерді жеткізу, зейнетақыларды беру, пандемия және ковидқа қарсы шаралардың салдарынан шекаралардың жабылуы және халықаралық әуе қатынастарындағы жүйелі кідірістер (2020-2021 жж. нәтижелері бойынша басқа елдермен айналым көлемі пандемияға дейінгі кезеңге қарағанда 30-40% пайызға түскен) себепті туындаған теріс қаржы нәтижелерін көрсетіп отыр. Алайда Қазпошта зейнетақыларды, жәрдемақыларды, мерзімді баспа басылымдарын жеткізу сияқты әлеуметтік барлық жүктемені орындауды жалғастыруда.
Екіншіден, теріс қаржы нәтижелері Қазпоштаның 17,8 мың адамнан тұратын өндірістік персоналының жалақысын көтеруге кедергі келтіреді. Бүгінгі күні жалақыларды индекстеу мәселесі өзекті болып тұр. Компания қызметтерінің тарифтерін өзгерту – өндіріс қызметкерлерінің еңбек жағдайларын жақсартуға бағытталған шаралардың бірі, - деп хабарлады баспасөз қызметі.
Айта кету керек, байланыстың әмбебап көрсетілетін қызметтеріне тарифтер 2019 жылғы деңгейде қалды (жай хаттарды жөнелту, МББ, пошта карточкалары мен сәлемдемелерді жеткізу). Сонымен қатар жеке тұлғалар арасында сұранысқа ие және бір уақытта бәсекелестік ортада жүрген тапсырысты хаттарды ел ішінде жөнелту және жеткізу тарифтері де өзгеріссіз қалды.
