Инновациялық Еуразия университетінің Сиань қаласындағы өкілдігі Қытай-Орталық Азия мәдени алмасу орталығының базасында ашылды (жетекшісі - Ван Ли), деп хабарлайды BAQ.KZ.
Осы аптада ИнЕУ бақылау кеңесінің төрағасы Шыңғыс Мәкенов пен университет ректоры Гүлвира Мұсабекова Қытайдың Сиань қаласындағы жоғары оқу орындарымен танысты. Сапар аясында Хуацин Сиань сәулет және технология университетімен келісімге қол қойылды, оның негізгі профилі - инженерлік бағдарламалар (Машина жасау және электротехника институты), Экономика және басқару институты.
Университетте жеті институт және он мыңнан астам студент бар. Қытайдағы 500 жетекші компаниямен жұмыс істейді. Инженерия, жасанды интеллект және робототехника саласында қуатты зертханалық базасы бар.
Сонымен қатар 20 мың студент оқитын Сицзин университетімен келісімге қол қойылды. Оқу орны Ұлыбританияның Де Монфорт университетімен, сондай-ақ әлемнің 11 елімен (Америка, Ұлыбритания, Беларусь және т.б.) оқытушылар мен студенттер алмасу, бірлескен ғылыми зерттеулер жүргізу саласында ынтымақтастық жасайды.
Делегация 8000 студент оқитын және жеке теміржол базасына ие Сиань жоғары технологиялық колледжінде болды. Мұнда мұғалімдер, инженерлер және орта медицина қызметкерлері оқиды.
Павлодар мен Сиань жоғары оқу орындары арасында халықаралық академиялық алмасу және оқытушылардың біліктілігін арттыру, академиялық алмасуға екі тараптың шетелдік сарапшылары мен ғалымдарын шақыру, заманауи академиялық үрдістермен және зерттеу нәтижелерімен танысуға профессорларды шақыру туралы келісімге қол жеткізілді.
Тараптар сондай-ақ ашық және инклюзивті саясат құруға келісті, оның мақсаты - динамикалық халықаралық білім беру ортасын құру.
.jpeg)
Қытай тарапы бұл бастама Қазақстан Республикасы мен Қытай Халық Республикасы басшыларының 2023 жылы Сиань қаласында өткен кездесуінен кейін дер кезінде жасалғанын атап өтті. Сол кезде Қазақстан Республикасының Бас консулдығы ашылып, «Бір белдеу – бір жол» жобасы аясында логистика, экономика және сауда қатынастары саласында түрлі бастамалар жүзеге асты. Кездесуге қатысушылар адами капитал жаһандық қатынастарды дамытудың басты құндылығы болып қала беретінін сөз етті.
Ал, бұған дейін Сиань қаласындағы жетекші жоғары оқу орындарының басшыларынан құралған делегация Инновациялық Еуразия университетіне барған болатын. Ынтымақтастық туралы меморандумға қол қойылып, Сианьда өкілдік құру туралы әңгіме қозғалған еді.
