Астанада «Әйелдер кәсіпкерлігін қолдау арқылы ауылдың тұрақты дамуы» атты жыл сайынғы конференция өтті, деп хабарлайды BAQ.KZ Ұлттық экономика министрлігіне сілтеме жасап.
ҰЭМ кәсіпкерлікті мемлекеттік қолдау және қорғау департаменті директорының орынбасары Мерей Исаева ауыл тұрғындарының табысы мен өмір сүру сапасын арттыру үшін жағдай жасау бойынша мемлекеттік қолдау шаралары туралы айтып берді.
Ұлттық экономика министрлігінің мәліметінше, 2012 жылдан бастап жұмыс істеп тұрған шағын және орта бизнес кәсіпорындарының саны 44%-ға өсіп, 1,4 млн-нан асты. Әйелдер шағын және орта кәсіпкерлік субъектілерінің 44,6% басқарады.
Ісін жаңа бастаған кәсіпкерлерді қолдау және халықты жұмыспен қамту саласында жұмыс істейтін қоғамдық ұйымдар онлайн форматта білім беру қызметтерін көрсету бойынша айтарлықтай тәжірибе жинақтады.
«Қосалқы ауыл шаруашылығы» мектебі (https://farmerschool.kz/) 2021 жылдан бастап «Еңбек» мемлекеттік платформасына енгізілді. Сондай-ақ, ісін жаңа бастаған кәсіпкерлер «Кәсіпкерлік негіздері» (https://ccb.kz/) платформасын пайдалана алады.
