Нұр-Сұлтан, BAQ.KZ. Мемлекет басшысы Қасым-Жомарт Тоқаев Орал қаласында биыл ашылған «Uniserv medical center» көпсалалы медицина орталығына барды, деп хабарлады Ақорданың баспасөз қызметі.
Замануи техникалармен жабдықталған денсаулық сақтау мекемесі алдын ала зерттеліп, сұранысқа сай бейімделіп салынған. Бұрындары облыс тұрғындары емделу үшін көрші елдің қалаларына көптеп баратын. Енді жергілікті тұрғындар осы орталықтан ақ, сапалы медициналық көмек алып отыр.
Жеке инвестиция есебінен салынған медициналық орталық көз және тіс аурулары бойынша консультациялық-диагностикалық қызмет көрсетеді.
Қазақстан Президенті орталықты өз қаржысына салып, мамандарын Оңтүстік Кореяда, Ресейде оқытқан инвесторға ризашылығын білдіріп, медицина қызметкерлерінің жұмысына сәттілік тіледі.
Айта кетейік, Мемлекет басшысы Қасым-Жомарт Тоқаев Батыс Қазақстан облысының жұртшылығымен кездесті. Жиын барысында ол БҚО-ның елімізді өркендетуге қосқан үлесін атады.
