Қазақстан мен Өзбекстан АӨК саласында бірлескен жобаларды жүзеге асыруда, деп хабарлайды BAQ.KZ.
ҚР Сауда және интеграцияның бірінші вице-министрі Арман Шәкқалиев Қазақстан мен Өзбекстанның аграрлық секторда бірлескен жобаларды дамыту жөніндегі күш-жігері туралы хабарлады. Олардың барлығы Қазақстан Президентінің 2022 жылғы желтоқсандағы Ташкентке сапары барысында қол қойылған инвестициялық келісімдер мен сауда келісімшарттарын іске асыру жөніндегі Жол картасына кіреді.
Ақмола және Қостанай облыстарының аумағында 2023 жылдың соңына дейін одан әрі Өзбекстанға экспорттау үшін дәнді және жемшөп дақылдарын бірлесіп өсіру жөніндегі жоба іске қосылады. Жақын арада Өзбек тарапы жер учаскелері мен серіктестік шарттарын анықтау үшін өңірлерге баруды жоспарлап отыр, - деді Арман Шакқалиев Алматыда өткен «Asia Grain Conference» халықаралық конференциясында сөйлеген сөзінде.
Бірінші вице-министрдің мәліметінше, бірлескен жобалардың қатарына Түркістан облысында 20 000 бас ірі қара мал бордақылау алаңы мен ет өңдеу кешенінің, сондай-ақ жеміс-жидек дақылдарын қайта өңдеу зауытының құрылысы кіреді. Бұдан басқа, Жол картасында 1 млн тоннаға дейін қазақстандық астықты терең өңдейтін астық өңдеу кластерін құру және «Орталық Азия» халықаралық өнеркәсіптік кооперация орталығының алаңында өсімдік майын тазарту жөніндегі жобаны іске қосу көзделген.
Қазақстан мен Өзбекстан арасындағы сауда ынтымақтастығын кеңейту шеңберінде UZKAZTRADE бірлескен экспорттық-импорттық компаниясы құрылды, оның үлесінің 50%-ы қазақстандық «QazTrade» АҚ-ға және 50%-ы өзбекстандық UZTRADE-ға тиесілі. Сыртқы сауда компаниясы бизнеске өнімнің өзара жеткізілімін ұлғайтуға және үшінші елдердің нарықтарына шығуға, өзара саудадағы шектеулер мен кедергілерді алып тастау жөнінде ұсыныстар әзірлеуге жәрдем көрсететін болады. Бастапқы кезеңде қазақстандық нарықтың қажеттіліктерін қамтамасыз ету үшін Өзбекстаннан жеміс-көкөніс өнімдерін сатып алу жоспарлануда.
Қазақстандық кәсіпкерлер үшін өзбек бағытының маңыздылығын сандар нақты көрсетеді. Арман Шаққалиев атап өткендей, экспорттаушыларды мемлекеттік қолдаудың ең сұранысқа ие құралы көлік шығындары мен тауарларды шетелдік нарықтарға, оның ішінде Өзбекстан нарығына жылжыту шығындарының бір бөлігін өтеу болды. Қазақстандық экспорттаушылар үшін шығындарды өтеуге жіберілген 8,85 млрд теңгенің 18%-ы мақұлданған өтінімдер бойынша экспорттық бағыттар бөлінісінде Өзбекстанға тиесілі болды.
Бұдан басқа «QazTrade» АҚ-ның Экспорттық акселерация бағдарламасын іске асырған екі жылы ішінде 85 отандық тауар өндіруші өз өнімдерін жылжыту үшін мақсатты нарық ретінде Өзбекстанды таңдады (2021 жылы – 29 компания, 2022 жылы – 56 компания).
Айта кетейік, Алматыда өткен 10-шы халықаралық конференцияға әлемнің 21 елінен 250-ге жуық делегат қатысты, оның ішінде қазақстандық агроөнімді импорттаушы ірі елдер: Өзбекстан, Қытай, Ауғанстан, Түркия, сондай-ақ Украина, ЕО, БАӘ, Малайзия және т.б. мемлекеттер бар.
