Қазақстандықтар оныншы тамызда Абай күнін атап өтеді, деп хабарлайды BAQ.KZ.
Биыл ұлы ойшыл, ақын Абай Құнанбаевтың туғанына 177 жыл. Облыс орталығында осы күнге дейін автордың шығармаларын бір уақытта орындау, көрмелер, сондай-ақ әдеби қонақ бөлмелер ұйымдастырылады.
Қарағанды облысы әкімдігі баспасөз қызметінің мәліметінше, ертең, 10 тамызда, сағат 11:00-де Абай шығармаларын бір уақытта орындау бойынша челлендж өтеді. Абай ескерткішінің алдында жүргізілген жөндеу жұмыстарына байланысты іс-шара орталық саябақ сахнасында, сондай-ақ Жаңа Майқұдық және "Молодежный" мәдениет үйлерінде, Теміржолшылар мәдениет сарайында өтеді. Іс-шараға барлық тілек білдірушілер қатыса алады.
Сондай-ақ, Абай шығармашылығын сүйетіндер "Абайдың өлеңдері, қара сөздері" тақырыбында онлайн-челленджге қатыса алады. Қатысу үшін көрсетілген тақырыпқа бейне түсіріп, оны әлеуметтік желілерде #АбайҚұнанбайұлы #АбайданаАбайдара хэштегтерімен жариялау қажет.
Әлеуметтік желілерде парақшалар болмаған жағдайда челленджге қатысу үшін ұйымдастырушылардың 8-701-496-45-25 WhatsApp нөміріне жолдауға болады. Жазбалар міндетті түрде жарияланады.
– Челленджді академик А. Сағынов атындағы Қарағанды техникалық университетінің студенттері Индира Сенбаева мен Зере Балтабай іске қосты. Оны көпшілік қолдады, – дейді қалалық ішкі саясат бөлімінің басшысы Нұржан Ілияс. – Мен өзім де қатысып, Қарқаралы ауданының әкімі Ерлан Құсайынға, Қарағанды қаласы әкімінің орынбасары Ләззат Ақылжановаға, Saryarqa Aqparat медиахолдингінің директоры Қамбар Ахметовке, AMANAT партиясы "Жастар Рухы" жастар қанаты Қарағанды облыстық филиалының төрағасы Ержан Хамитке челленджді жолдадым. Біздің челленджді Түркістан облысы Төлеби ауданы орталық кітапханасының қызметкерлері де қолдағаны қуантады. Олар Абайдың "Желсіз түнде жарық ай" әнін орындап, бізге өз бейнелерін жіберді. Осылайша, біздің челлендж Республикалық болды.
Сонымен қатар, 10 тамыз күні сағат 12:00-де Теміржолшылар мәдениет сарайында "Абай-дана, Абай-дара қазақта" атты кітап көрмесі ұйымдастырылады.
Орталық саябақта "Киіз үйдегі кітапхана", "Абай әлемі" атты әдеби экспозициялар ұйымдастырылады. Олар 12:00-ден 15:00-ге дейін жұмыс істейді.
Сағат 15:00-де жаңа Майқұдық мәдениет үйінде "Абай – дана, Абай – дара қазақта" атты әдеби-сазды кеш өтіп, "Абай – ұлт рухының жаршысы" атты кітап көрмесі ұйымдастырылады.
Осы уақытта "Молодежный" мәдениет сарайында "Ұлы ақын, философ және ойшыл Абай Құнанбаев" ертеңгілігі өтеді. Ал орталықтандырылған кітапхана жүйесінің №29 филиалының қызметкерлері оқырмандар үшін "Абай – ұлы даланың ұлы ақыны" бейнесұхбатын дайындайды. Филиал мына мекен-жайда орналасқан: Степной ықшам ауданы, 1, 45 үй.
Орталық қалалық кітапханада сағат 15:00-де "Ұлылардың ұлысы – Абай" виртуалды портретінің тұсаукесері өтеді.
Қаланың балалар-жасөспірімдер клубтары кітапхана қызметкерлерімен бірге ақпараттық сағаттар, викториналар және тақырыптық сағаттар өткізеді.
Еске сала кетейік, Абай Күні 2020 жылы Қазақстанның мереке күндерінің күнтізбесіне енгізілген болатын. 10 тамызда еліміздің барлық қалалары мен облыстарында ақынның өмірі мен шығармашылығына арналған іс-шаралар өтеді.
