Павлодардағы ұшақ апаты: Аман қалған ұшқыштың жағдайы белгілі болды

Павлодар облысында апатқа ұшыраған Ан-2 ұшағынан аман қалған ұшқыштың жағдайы туралы дәрігерлер мәлімет берді.

1998 жылы туған науқас Апаттар медицинасы орталығының бортымен Железин аудандық ауруханасынан Павлодар қалалық №1 ауруханасының политравма бөліміне жеткізілді. Қазіргі уақытта диагностикалық тексерулер жүргізіліп жатыр, – деп мәлімдеді Денсаулық сақтау басқармасы.

Кейін дәрігерлер зардап шеккен азаматтың Павлодар қалалық №1 ауруханасының жансақтау және қарқынды терапия бөліміне «политравма» диагнозымен түскенін нақтылады.

Науқасқа толық көлемде қажетті ем көрсетіліп жатыр. Оның жағдайы тұрақты бақылауда, – деді ведомство өкілдері.

Еске салайық, 27 мамыр күні таңертең Павлодар облысында Ан-2 жеңіл көпмақсатты ұшағы апатқа ұшырады. Бортта экипаждың екі мүшесі болған. Бір ұшқыш қаза тауып, екіншісі аман қалған. Ол шұғыл түрде Павлодарға жеткізілді.