Нұр-Сұлтан, BAQ.KZ. Өңір тұрғындары «Қару» акциясы аясында 10 күн ішінде 72 бірлік тегіс ұңғылы қару тапсырды, деп хабарлайды Pavlodarnews.kz.
Облыстық ПД баспасөз қызметінің дерегінше, оның ішінде 4 бірлік ұзын ұңғылы ойық қаруды, 1 бірлік жарылғыш құрылғы және 16526 дана ойық ұңғылы қарудың патрондары бар.Жалпы сомасы 6 миллион теңгеге қару тапсырылды. Қазіргі уақытта мылтықтар баллистикалық сараптамаға жіберілді, соның нәтижелері бойынша азаматтарға ақша төлеу туралы шешім қабылданады. Мысалы, Екібастұз тұрғыны тіркелмеген үш тегіс ұңғылы мылтықты өз еркімен тапсырды: «ИЖ» маркалы тегіс ұңғылы мылтық, 16 калибрлі, белгіленбеген маркалы тегіс ұңғылы мылтық,12 калибрлі және белгіленбеген маркалы тегіс ұңғылы мылтық. Аталған қарулар жалпы сомасы 183 771 теңгеге 2 санат бойынша сатып алуға жатады, - деді полиция департаменті бастығының бірінші орынбасары Жасқайрат Қайыров.
Сондай-ақ Екібастұз қаласының тағы бір тұрғыны тіркелмеген 16 калибрлі бір ұңғылы тегіс ұңғылы мылтықты әкелген. Бұл қару 61257 теңге сомасына 2 санат бойынша сатып алуға жатады.
Айта кетейік, 20 сәуірде бүкіл республика бойынша тіркелмеген атыс қаруын, оқ-дәрілер мен жарылғыш заттарды халықтан сатып алу акциясы басталған болатын. Қару-жарақ заттарын өз еркімен тапсырған павлодарлықтар қарудың түріне қарай әр бірлігі үшін 10-нан 100 АЕК-ке дейінгі сомада төлем алады.
Барлық туындаған сұрақтар бойынша 8 (7182) 39-11-75 телефонына хабарласып, полицияға жүгінуге болады.
