Нұр-Сұлтан, BAQ.KZ. Бұл туралы Білім және ғылым министрі Асхат Аймағамбетов хабарлады. Сондай-ақ ол заңға енгізілген түзетулер ғылым саласын қаржыландыру мен қолдау шараларын жақсартуға бағытталғанын алға тартты.
Оның айтуынша, бұрын-соңды ғалымдардың қатысуымен өтетін әрбір кездесуде ғылыми зерттеулерді қаржыландыру мерзімін 3 жылдан 5 жылға дейін ұлғайту мәселелері көтерілетін. Жалақыны базалық қаржыландыру тетігіне тек басшылар мен көмекші қызметкерлерді ғана емес, сонымен бірге ғылыми қызметкерлерді де қосу қажеттілігі туралы мәселе жылдар бойы өзекті болған.
Гуманитарлық бейіндегі ғалымдарымыз (қазақ әдебиеті, тіл білімі, Қазақстан тарихы, археология, философия және т.б.) осы бағыттарды қаржыландыру мәселесіне ерекше назар аудару қажет екендігін 10 жылдан астам уақыттан бері айтып келеді. Ендігі кезекте Президенттің тікелей қолдауының арқасында және Қазақстан халқына Жолдауында айтылған тапсырмаларының нәтижесінде бұл мәселелердің барлығы Үкіметтің бастамашылық етуімен әрі Парламент депутаттарының қолдауымен қабылданған жаңа түзетулерде өз шешімін тапты, - деп атап өтті еліміздің бас ұстазы.
Сондай-ақ қысқа мерзім ішінде қажетті түзетулер әзірленіп, Парламенттің қарауына енгізіліпті.
Бұл дегеніміз, кем дегенде 1600 ғалым базалық қаржыландыру шеңберінде тұрақты негізде жалақы ала бастайды. Ал гуманитарлық бейіндегі институттар тікелей қаржыландыру шеңберінде тек гранттық жобаларға ғана тәуелді болмай, керісінше, өз бағыттары бойынша зерттеулер жүргізу үшін тұрақты қаржыландырылатын болады. Сонымен қатар ғылыми қауымдастық көптеген жыл бойы Ұлттық ғылыми кеңестер жұмысының объективтілігін арттыруға ұмтылып келеді. Өйткені бюджеттік қаржыландыру туралы шешімді ғылыми кеңестер қабылдайды, - деп отыр министр.
Ведомство басшысының хабарлауынша, соңғы екі жылда бұл кеңестердің жұмысында айтарлықтай оң өзгерістер болған.
Ұлттық ғылыми кеңес шешімдерінің барынша негізділігі мен объективтілігін қамтамасыз ету үшін заң жүзінде апелляциялық комиссия енгізіліп жатыр. Комиссия Ұлттық ғылыми кеңес шешімдеріне қатысты ғалымдардың апелляциялары мен Әдеп кодексін сақтау мәселелерін қарастыратын болады, - деді Асхат Аймағамбетов.
