Нұр-Сұлтан, BAQ.KZ. 24 наурызда «Қазгидромет» РМК деректері бойынша 13 өңірде (Нұр-сұлтан, Шымкент қалалары, Ақмола, Ақтөбе, Атырау, Жамбыл, Қарағанды, Қызылорда, Маңғыстау, Павлодар, Түркістан, ШҚО және СҚО) дауылды ескертулер жарияланды.
Нұр-сұлтан қаласы, Ақмола және Қарағанды облыстарының ТЖД дағдарыс орталықтарында жедел штабтар жұмыс жасауда.
Қазіргі уақытта ауа райының нашарлауына байланысты (боран, қар, нашар көріну) 5 өңірде, атап айтқанда Нұр-сұлтан қаласы, Ақмола, Қарағанды, Шығыс Қазақстан, Павлодар облыстарында республикалық маңызы бар автожолдардың 16 учаскесі және облыстық маңызы бар автожолдардың 37 учаскесінде жол жабық.
Нұр-сұлтан қаласы, Ақмола және Қарағанды облыстарындағы бекеттерде 232 бірлік техника, оның ішінде 154 бірлік жүк және 78 бірлік жеңіл техника тұр.
ТЖМ аумақтық бөлімшелері өткен тәулікте Нұр-Сұлтан қаласында, Ақмола, Алматы, Қарағанды, Павлодар облыстарында қар құрсауынан 724 адамды, оның ішінде 111 баланы құтқарды, 425 бірлік техниканы шығарды
Ақмола және Қарағанды облыстарының жылыту пункттеріне 463 адам, оның ішінде 75 бала орналастырылды.
Шұғыл жұмыстарға ТЖМ, ІІМ, ЖАО және жол қызметтері барлығы 608 адам және 325 бірлік техника жұмылдырылды.
Халықты ескерту мақсатында ауа райының нашарлауы туралы 57 СМС-хабарлама жіберілді, "Дәрмен" мобильдік қосымшасы арқылы 53 хабарлама жіберілді, халық 112 және 101 пульттеріне көмек көрсету және ақпарат алу үшін 6886 рет жүгінді.
ТЖМ азаматтарды ауа-райының өзгерістерін бақылауға шақырады. Дауылды ескерту туралы хабарламаларды тыңдап, қажетті сақтық шараларын сақтаңыздар.
