Бас жаңалықтар
Шымкенттегі газ құю стансасындағы жарылыстың неден болғаны анықталды
12 Шілде 2019, 09:53 218

Шымкенттегі газ құю стансасындағы жарылыстың неден болғаны анықталды

Шымкент, BAQ.KZ. Шымкентте автоцистерналарды толтыруға арналған газ құю стансасындағы өрт сұйық отынды құю кезіндегі технологиялық процестің бұзылуынан болған. Оқыс жағдайды бір айға жуық зерттеген арнайы топ осындай қорытындыға келді. 

"Комиссия төрағасының айтуынша, сиымдылығы 60 текше метрлік автоцистернадан газ құю кезінде шланг толық бұралмай, ажырап кеткен. Ол кезде екпіні қатты газ 20 жастағы операторды ұшырып жіберген. Арада он секундтай уақыт өтер-өтпестен шланг темірі соғылып ұшқын пайда болып, жарылысқа әкелген. Автоцистерна жүргізушісі қашып үлгергенмен, оператор жалын ортасында қалып қойған" - деп хабарлады Астана телеарнасы.

Дәрігерлер үш күн арпалысқанымен 20 жастағы жігіт бақилық болған. Комиссия мүшелері апатқа серіктестік тарапынан жіберілген бірқатар кемшілік себеп екенін де айтты.

"Бригаданың құрамын толық жасақтамаған. Екі адамның орнына бір адамды жұмысқа жіберген, негізі сол. Технологиялық регламент жасалмаған, осы газ толтыру жұмыстарының технологиялары жасалмаған. Ол тех. регламентте барлық тәртібі, қандай қауіпсіздік шаралары бар, қалай істелуі керек бәрі толық жазылуы керек та. Онымен оператор таныстырылуы керек. Соны таныстырып оқыту жағы бұл жерде толық жүргізілмей отыр" - дейді ҚР ИИДМ ИДӨҚ Комитетінің Шымкент қаласы бойынша департамент басшысының орынбасары Сәрсенбай Теңлесбай. 

Қайғылы оқиға 7-ші маусымда болды. Денесінің 98 пайызы күйіп қалған марқұм отбасындағы сегіз баланың тұңғышы екен. Ол газ құю стансасында өткен жылдың күзінен жұмыс істеп келген. Зардап шеккен отбасыға берілетін материалдық көмек мөлшері әзірге айтылмады. Ал тексеру тобы шыққан қорытындыны полиция департаментіне жолдайтын болады.


Фото: ашық дереккөз

Сізден жаңалық