Көлгінов: Салғырт құрылысшылар қара тізімге кіреді

6 Наурыз 2021, 20:25
1293
Бөлісу:
Көлгінов: Салғырт құрылысшылар қара тізімге кіреді

Нұр-Сұлтан, BAQ.KZ. Бүгін астана әкімі Алтай Көлгінов Есіл ауданындағы бірқатар әлеуметтік нысан құрылысымен танысты. Бұл туралы әкім өзінің инстаграм парақшасында жазды.

Жеңілдікпен берілетін баспана салу рекордын биыл да қайталау үшін, алғышарттарын былтыр-ақ дайындаған едік. Бірнеше әлеуметтік баспана ғимараты салынатын осы ауданда 2 мың оқушыға шақталған мектеп те салынып жатыр, осылайша, екі ауысымда оқитын қосымша 4 мың оқушы қамтылады. Құрылыс қарқынын бәсеңдетпеуді, үйлер мен оқу нысандарының сапасын ерекше назарда ұстауды тапсырдым. Салғырт құрылысшылармен келісімді үзіп, қара тізімге кіргізетін боламыз - деді әкім өз жазбасында.

Ол биыл, шамамен 10 мың - жеңілдікпен берілетін баспана тапсыруды жоспарлап отырғанын айтты.

Салыстыру үшін: жеңілдікпен 2018 жылы - 1 100 пәтер, 2019 жылы – 2 900, ал 2020 жылы - 7 мыңнан астам әлеуметтік баспана берілген екен. Мемлекет басшысының нұсқауымен жеңілдікпен берілетін баспана құрылысын жүйелі түрде арттырып жатырмыз. Білім ошақтарының құрылысына келетін болсақ, биыл барлығы 40 мың орынға мектептер ашамыз. Бұл былтырмен салыстырғанда екі есеге, ал 2019 жылмен салыстырғанда - төрт есе көп. Енді мектептерді габаритті етіп салуға көшпекпіз. Бұған қоса, 5-жылдық кешенді жоспарға сәйкес мемлекеттік 50 мектеп саламыз. Білім ошақтарының құрылысына жеке инвестиция да тартылып жатыр - деді Алтай Көлгінов.

Өзгелердің жаңалығы