Нұр-Сұлтан, BAQ.KZ тілшісі. Елбасы Нұрсұлтан Назарбаевтың жаңа сайты іске қосылды. Бұл туралы оның баспасөз хатшысы Айдос Үкібай Твиттерде жазды.
«Достар, Тұңғыш Президенттің ресми интернет-ресурсы Elbasy.kz іске қосылды. Жаңа сайтқа байланысты ұсыныстарыңыз бен пікірлеріңізді, тілектеріңізді осы посттың астына қалдырсаңыздар қуанар едім», - деп жазды Айдос Үкібай.
Елбасы өкілеттілігін тоқтатқаннан кейін өзіне қатысты ақпараттар Ақорданың ресми сайтында жарияланған болатын. Кеше Айдос Үкібай жаңа сайт іске қосылатынын алдын ала хабарлады. Қазір жаңа сайт Нұрсұлтан Назарбаевтың соңғы жаңалықтарымен толтырылған.
Сонымен қатар, Нұрсұлтан Назарбаевтың өмірбаяны, президент болып сайланған күннен бастап қызметтік жолы, халықаралық беделі мен мемлекет астанасы Нұр-Сұлтан қаласы туралы мәліметтерді сайттан оқуға болады.
