«BURABAY ICE 2023»: «Бурабай» ұлттық паркінде мұзда жүгіруден Қазақстан тарихындағы алғашқы халықаралық жарыс өтеді, деп хабарлайды BAQ.KZ.
Қазақстандық және шетелдік əуесқойлар 19 ақпанда «Бурабай» ұлттық саябағына жиналып, Жұмбақтастың жанында, қалың мұз қатқан айдын бетінде экстремалды жарысқа қатысады.
ҚР Президентінің Іс Басқармасына қарасты «Бурабай-Даму» ЖШС, «Бурабай» ұлттық паркі, «Экстремалды Атлетика» қоғамдық бірлестігі және «Rebel Running» ЖК бірлесіп арқаның қатал қысына, ызғарлы желіне жəне кристал мұзына қарсы тұратындарға осындай ерекше сынақ дайындап отыр.
Жарыс бірнеше қашықтықта яғни 7 км, 14 км жəне 21,1 км жүгіру немесе 7 км скандинавиялық жүріс бойынша өтеді.
Қазіргі уақытта сайысқа қатысуға 200-ден астам спортшы тіркелген. Олардың арасында АҚШ, Канада, Африка, Еуропа елдерінің, Өзбекстан, Қырғызстан, Моңғолия спортшылары, сондай-ақ Қазақстанның барлық облыстарының спортшылары бар. Тіркеу әлі де жалғасып жатыр.
Қыс мезгілінде көлдің мұзайдынында бұқаралық спорт жарысын өткізу елімізде бұрын-соңды болып көрген емес. Біз алғаш рет қолға алып отырмыз. Табиғаты әсем Бурабай өңірінде, аты аңызға айналған Жұмбақтастың жанындағы экстермалды сайыс өте қызықты өтеді деген сеніміміз мол. Әрине, әуесқой спортшылар үшін бұл сынақ оңайға түспейді. Дегенмен, осындай сынақ адамның ерік-жігерін шыңдауға да көмектеседі. «Бурабай-Даму» серіктестігінің мақсаты – осындай іс-шаралар арқылы өңірдің әсем табиғатын жұртшылыққа насихаттай отырып туристердің қызығушылығын арттыру, сондай-ақ салауатты өмір салтын насихаттау. Біздің компанияның құрылғанына биыл 8 жыл толады, сол себепті биыл осындай іс-шаралар көбірек өткізілетін болады», дейді «Бурабай-Даму»ЖШС бас директорының орынбасары Қасымжан Кенжешов.
Бұл жарысқа кез келген жастағы спортшылар мен жастар қатыса алады. Сондай-ақ мәреге жеткен спортшылардың барлығы марапатталады.
Жарыс 19 ақпан күні сағат 10:-00-де басталады.
