Мәжіліс депутаты Асхат Аймағамбетов әкімдіктердің қабылдаған шешімдері жеткілікті деңгейде іске асырылмай жатқанын айтты, деп хабарлайды BAQ.KZ тілшісі.
Мәжілісте мектепке дейінгі және орта білім беру ұйымдарындағы қауіпсіздік жүйелерінің жай-күйі туралы дөңгелек үстел өтіп жатыр.
Жиын Әлеуметтік-мәдени даму комитетінің төрағасы Асхат Аймағамбетовтің төрағалығымен өтіп жатыр.
Бүгін өте маңызды мәселе қаралып отыр. Осы мәселеге көбіне саясатты орталық атқарушы органдар белгілейді. Бірақ қабылданған шешімдерді, нормативтік-құқықтық актілерді орындайтын - ол жергілікті атқарушы органдар. Сондықтан көп мәселе жергілікті әкімдіктердің жұмысына байланысты. Мысалы, бүгін көтерілетін мәселелердің ішінде бейнекамералар, жалпы қауіпсіздік мәселелері бар, - деп айтты Аймағамбетов.
Депутат атап өткендей, бейнекамераларды, турникеттерді орнату, қауіпсіздік жүйелерін іске қосу бойынша жалпы саясатты Оқу-ағарту министрлігі бекітеді.
Бірақ осы саясаттың іске асырылуы жергілікті әкімдіктерге байланысты. Әкімдіктердің деңгейінде қабылданған шешімдер жеткілікті деңгейде іске асырылып жатқан жоқ, - деп айтты депутат Асхат Аймағамбетов Мәжілісте.
