Нұр-Сұлтан, BAQ.KZ. Премьер-министр Асқар Маминнің төрағалығымен Қазақстан Республикасы Президенті жанындағы Шетелдік инвесторлар кеңесінің (ШИК) аралық отырысы өтті.
ШИК-тің инвестициялық саясатты іске асыру, энергетика, экология және мұнай-газ саласы, еңбек заңнамасы, адами капиталды дамыту және шетелдік жұмыс күшін тарту, цифрландыру жөніндегі бірлескен жұмыс топтарының қызметі туралы «Шетелдік инвесторлардың қазақстандық кеңесі» қауымдастығының басқарма төрағасы, «EY» компаниясының Қазақстан және Орталық Азия бойынша басқарушы серіктесі Ерлан Досымбеков, «Total Energies Kazakhstan» басшысы Алем Фрига-Ной, «КНАУФ» компаниясының ҚР-дағы өкілі Димитри Пропп, Қазақстан және Орталық Азиядағы «KPMG» басқарушы серіктесі Сәкен Жұмашев баяндады.
Премьер-министрдің орынбасары – сыртқы істер министрі Мұхтар Тілеуберді, ұлттық экономика министрі Әсет Ерғалиев, қаржы министрі Ерұлан Жамаубаев, еңбек және халықты әлеуметтік қорғау министрі Серік Шәпкенов, цифрлық даму, инновациялар және аэроғарыш өнеркәсібі министрі Бағдат Мусин, энергетика министрі Мағзұм Мырзағалиев, экология, геология және табиғи ресурстар вице-министрі Ахметжан Пірімқұлов, денсаулық сақтау вице-министрі Жандос Бүркітбаев түсініктеме берді.
Отырысқа қатысушылар жаһандық экономикалық күн тәртібін трансформациялау және оның бағытын пандемиядан кейінгі қалпына келтіруге қайта бағдарлау тұрғысынан ҚР инвестициялық саясатының өзекті мәселелерін талқылады.
Премьер-Министр Қазақстан COVID-19-дың экономикалық салдарын сәтті еңсере алғанын атап өтті. Биылғы 11 айдың қорытындысы бойынша экономика өсім көрсетіп қана қоймай, сондай-ақ өндірістің пандемияға дейінгі көрсеткіштерінен де асып түсті. Биылғы қаңтар-қараша айларында ЖІӨ өсімі 3,8% құрады.
Экономиканың белсенді қалпына келуі аясында тікелей шетелдік инвестициялар ағынының артқаны байқалады. 2021 жылдың бірінші жартысында ҚР экономикасына салынған ТШИ көлемі 30%-дан астамға ұлғайды.
Шетелдік инвестициялардың ең көп өсімі ақпарат және байланыс (9,4 есе), тұру және тамақтану саласындағы қызметтер (66,1%-ға), өңдеу өнеркәсібі (57,2%-ға) сияқты салаларда байқалады.
Өндіруші емес секторларда негізгі капиталға салынған инвестициялар 11%-дан астамға өсті. Құрылыс (2,1 есе), өңдеу өнеркәсібі (+50,5%), ауыл шаруашылығы (+40,5%) және сауда (+34,2%) салаларында инвестицияның қарқынды өскені байқалады.
Көптеген халықаралық қаржы ұйымдары ҚР экономикасының 2021 жылы 4%-ға дейін және 2022 жылы 4,5%-ға дейін өсуін болжайды.
Дағдарыстан кейінгі қалпына келтірудің басым стратегиялық бағыттары ретінде Үкімет басшысы экономиканың өнеркәсіптік әлеуетін арттыруды, жаһандық нарықтарға кешенді интеграциялануға жәрдемдесуді, ауыл шаруашылығы әлеуетін дамытуды, цифрландыруды, инфрақұрылымның сапасы мен қолжетімділігін арттыруды атады.
Премьер-Министр өткен жылы Президент жанындағы Шетелдік инвесторлар кеңесінің газ жағудан бөлінетін шығарындылар үшін айыппұл есептеу кезіндегі дискриминациялық тәсілді жою, сондай-ақ бизнесті салықтық құқық бұзушылықтар үшін қылмыстық жауапкершілікке тарту шегін оңтайландыру туралы ұсыныстары қолдау тапқанын атап өтті.
ШИК-пен бірлесіп жаңа инвестициялық құрал – жер қойнауын пайдалану саласындағы жақсартылған модельдік келісімшарт әзірленді, мұнай-газ саласында шетелдік инвесторлармен жедел өзара іс-қимыл жасау үшін «бір терезе» қағидаты бойынша Ведомствоаралық фронт-офис құрылды, цифрландыру мәселелері бойынша тұрақты жұмыс тобы құрылды.
