Нұр-Сұлтан, BAQ.KZ. Климаттың өзгеруінің ауыл шаруашылығына әсерін Ауыл шаруашылығы бірінші вице-министрі Айдарбек Сапаров Германия федералдық министрлігі жанындағы парламенттік статс-хатшысы Уве Файлермен «Германия мен Қазақстан арасындағы аграрлық азық-түлік секторы саласындағы ынтымақтастық туралы екіжақты консультациялар» бейнеконференциясы барысында талқылады.
АШМ мәліметінше, кездесу барысында тараптар климаттың өзгеруінің азық-түлік қауіпсіздігіне және агроөнеркәсіптік кешеннің дамуына әсерін ортаға салып, екі елдің аграрлық саясатының өзекті аспектілерімен алмасты. Сондай-ақ екіжақты кооперациялық жобаларды іске асыруды және Қазақстанға заманауи ауыл шаруашылығы техникасының импортын талқылады.
Құттықтау сөзінде Ауыл шаруашылығы бірінші вице-министрі Айдарбек Сапаров неміс тарапына Германияның батысындағы көптеген адам шығыны мен қирауына әкеп соққан су тасқынына байланысты көңіл айтты. Ол, сондай-ақ, Қазақстанның ауыл шаруашылығындағы құрғақшылықтың әсерінен қалыптасқан жағдай туралы және зардап шеккен фермерлерді қолдау бойынша қабылданып жатқан шаралар туралы хабардар етті.
Сондай-ақ құрғақшылықтан зардап шеккен фермерлерге Үкімет тарапынан жан-жақты көмек көрсетілгенін айтқан ол, азыққа жұмсалған шығындардың өтеліп, тұрақтандыру қорын қалыптастыру үшін фермерлік шаруашылыққа дайындалған пішенді сатып алуға және жеткізуге, кебек сатып алуға қаражат бөлінгендігін атап өтті.
Климаттық жағдайлардың кез келген өзгерісі ауыл шаруашылығына әсер етеді. Біз құрғақшылықпен күрес тәсілдерін қайта қарау қажеттігі туралы мәселенің пісіп-жетілгенін түсінеміз. Бүгінгі төтенше жағдайлар туралы ғана емес, болашақта осындай жағдайлардың алдын алу туралы да ойлану қажет, - деді бірінші вице-министр.
Өз кезегінде Германияның парламенттік статс-хатшысы Уве Файлер тұрақты ауыл шаруашылығын жүзеге асыру және климатты қорғау жөніндегі жоспарларымен бөлісті, сондай-ақ, биыл маусым айында Еуроодақ елдерінің Брюссельде өткен келіссөздері барысында қол жеткізілген жалпы аграрлық саясаттың реформасы туралы айтты.
Брюссельдегі келіссөздер біздің тұрақты ауыл шаруашылығы туралы идеяларымыз дұрыс бағыт екенін көрсетті. Осылайша, болашақта еуродотациялар климатты қорғау және қорғау шараларына байланысты болады, тікелей төлемдердің кем дегенде 25% - ы климатты қорғау және табиғатты қорғау бойынша ерікті шараларға байланысты болады. Бұл дегеніміз, адамдар жер учаскелерін иемденгені үшін ақша алмайды, төлемдер бұл жердің қалай өңделетініне байланысты болады, - деді ол.
Мейманның айтуынша, пестицидтерді, тыңайтқыштарды, антибиотиктерді қолдануды азайтуды қолдайды, бірақ бұл мақсаттар фермерлер үшін нақты болуы керек. Пестицидтердің көмегімен өнімнің көлемі мен сапасы қамтамасыз етіледі. Өсімдік аурулары әлі күнге дейін барлық егіннің 40%-ын жояды.
Ауыл шаруашылығы бірінші вице-министрі А.Сапаров өз кезегінде 2021-2025 жылдарға арналған АӨК ұлттық жобасын іске асыру аясында су үнемдеу технологияларын кеңінен енгізу, су беруді субсидиялау тетігін жетілдіру бойынша шаралар қабылданатынын мәлімдеді.
Қуаттылығы жылына 1000 қондырғыға дейінгі заманауи суару жүйелерін шығаратын зауыт құрылысының жобасы іске асырылатын болады. Бұл су үнемдеу технологияларын қолдану алаңдарын 15-тен 21%-ға дейін ұлғайтуға мүмкіндік береді, сондай-ақ, 3 млн тонна көлемінде қосымша ауыл шаруашылығы өнімдерін өндіруді қамтамасыз етеді, - деді ол.
Көтерілген мәселелерді талқылау нәтижелі деңгейде өтті. Жалпы, тараптар ауыл шаруашылығы саласындағы қазақстан-герман қатынастарының тұрақты дамуын атап өтті.
Айта кетейік, бейнеконференцияның еуропалық қатысушылары Қазақстанның АӨК саласындағы жобаларды іске асыруға қызығушылық танытты.
