Нұр-Сұлтан, BAQ.KZ. Павлодарда «Қайырымды істер марафоны» жалпыұлттық жобасы аясында «Менің таза әлемім» челленджі басталды.
Ұйымдастырушылар «ARCUS» даму орталығы және «Альрами» менталды ауытқулары бар тұлғаларға арналған қоғамдық бірлестік клуб үйі.
Челленджді 30-дан астам адам қолдады: олардың ішінде «Альрами» клуб үйі мен «ARCUS» даму орталығының мүшелері, «Қазақстан алюминийі» АҚ және «Жасыл Ел» Жастар жасақтарының еріктілері, белсенділер, менталды ауытқулары бар адамдар және бейжай емес азаматтар. Қатысушылар Ертіс өзенінің жағалауын тазалап, 40 қап қоқыс жинады.
Алғаш рет мұндай сенбілікті біз 2019 жылы өткіздік, содан бері бұл біз үшін жақсы дәстүрге айналды. Біз міндетті түрде челленджімізді жалғастырамыз және алдағы уақытта әлеуметтік желілерде сенбіліктер туралы хабарлайтын боламыз. Барлық ниет білдірушілер бізбен бірге қатыса алады. Табиғатты бағалайық және бүлдірмейік! Өйткені, бұл біздің денсаулығымыз бен болашақ ұрпақтың денсаулығы!,- деді «ARCUS» даму орталығының жетекшісі Алина Батареева.
Ұйымдастырушылардың айтуынша, бұл акция халықтың экологиялық мәдениетін қалыптастырумен қатар, психоневрологиялық аурулары бар адамдардың әлеуметтенуіне ықпал етеді.
Айта кету керек, биыл 24 шілдеде әр өңірде жартастар мен су айдындарын тазарту бойынша ауқымды экоакциялар өтеді және оларға кез келген адам қосыла алады.
