Көлгінов елордалық көше тазалаушыларға алғысын білдірді

2 Наурыз 2020, 08:50
1813
Бөлісу:
Көлгінов елордалық көше тазалаушыларға алғысын білдірді

Нұр-Сұлтан, BAQ.KZ. Елорда әкімі Алтай Көлгінов коммуналдық қызметкерлерді алғыс күнімен құттықтап, олардың адал әрі қажырлы еңбегінің маңыздылығын атап өтті.

Сіз ауа райының қолайсыздығына қарамастан күндіз-түні еңбектеніп жатырсыз. Өз тарапымыздан қолдау көрсетіп, еңбек жағдайын жақсартуға тырысамыз: коммуналдық қызмет паркін жаңартамыз. Еңбегіңізді жоғары бағалаймыз. Атқарып жатқан адал жұмысыңыз үшін алғысымды білдіремін, - деді қала әкімі Алтай Көлгінов.

Елорда әкімі Алтай Көлгіновтің тапсырмасына сәйкес 2020 жылдың басынан бері коммуналдық қызметкерлердің еңбекақысы көтеріліп, сыйақы берілді. Алпысбай Хамытбек коммуналдық қызметте 6 жыл жұмыс істеп келеді.  
Мен шеткері аймақтың тұрғынымын. Жұмысқа 3:30-да тұрамын. Автобус алып кетеді. Таңғы сағат 6-да біз жұмысқа кірісеміз. Жұмыс өте көп. Тіпті ауа райының қолайсыздығына байланысты 2-3 күн үйге бармай, жұмыс жасағанымыз бар. Коммуналдық қызметке міне, алтыншы жыл жұмыс жасап келемін. Осы уақыт ішінде биылғыдай қар көрмеппім. Біздің жұмысымызды бәрі көре бермейді, себебі қарды тазалаған соң қайта қалың қар жауады. Біз күшімізді аямай, қаланың таза болуы үшін жұмыс істейміз, - деді Алпысбай Хамытбек.

Қаланың коммуналдық қызметкерлері күшейтілген тәртіпте жұмыс істейді. Қысқы кезеңде 5 млн 28 мың текше метр қар шығарылды, өткен жылы 1 млн 900 мың текше метр қар шығарылды.

"Қазгидромет" РМК мәліметтері бойынша, ақпанда жауған қар мөлшері нормадан үш есе жоғары болды (норма 15 мм, 45 мм түсті). Қаңтарда - 53 мм (норма 16 мм), желтоқсанда - 39 мм (норма 22 мм )қар түсті.

Былтыр қараша айынан наурыз айына дейін 99 мм қар түсті, биыл қараша айынан ақпан айына дейін 184 мм қар түсті. Бұл нормадан екі есе жоғары.


Өзгелердің жаңалығы