Иран жаңа ірі табиғи газ кен орнын анықтады

Иран елдің оңтүстігіндегі Оңтүстік Парс аймағында 7,5 трлн текше футтан астам табиғи газ қоры табылғанын мәлімдеді, деп хабарлады Анадолы Агенттігі.

Иранның мұнай министрі Мохсен Пакнежадтың айтуынша, қордың 72%-дан астамын өндіруге болады. Осылайша, алынатын газ көлемі шамамен 5,7 трлн текше футқа бағаланып отыр.

Министр жаңа қордың көлемі Оңтүстік Парстың бір фазасы 15 жыл ішінде өндіретін табиғи газ мөлшеріне тең екенін атап өтті.

Табылған қор негізінен «құрғақ газдан» тұрады. Оны күрделі өңдеусіз немесе ең аз тазартудан кейін тасымалдауға болады. Бұл кен орнын игеру және пайдалану шығындарын төмендетуге мүмкіндік береді.

Сонымен қатар кен орнында газ конденсатының елеулі қоры анықталған. Иран билігінің бағалауынша, жаңа газ бен конденсат қорлары ел экономикасына ондаған миллиард доллар көлемінде қосымша құн әкелуі мүмкін.