Ұжымдық қауіпсіздік туралы шарт ұйымының бас хатшысы лауазымына Иманғали Тасмағамбетов тағайындалды, деп хабарлайды BAQ.KZ.
Ұжымдық қауіпсіздік кеңесі ҰҚШҰ-ның жоғары органы саналады.
Оның құрамына мүше мемлекеттердің басшылары, атап айтқанда Қазақстан, Армения, Беларусь, Қырғызстан, Тәжікстан және Ресей Президенттері кіреді. Дәл осы кеңестің келісімімен ҰҚШҰ бас хатшысы тағайындалады.
ҰҚШҰ бас хатшысы ұйымның жоғары әкімшілік лауазымды тұлғасы саналады және ұйым хатшылығына басшылық жасайды.
2020 жылдың 1 қаңтарынан бұл қызметті Беларусь елінің өкілі генерал-лейтенант Станислав Васильевич Зась атқарып келген болатын.
Иманғали Нұрғалиұлы Тасмағамбетов 1956 жылы 9 желтоқсанда Гурьев (қазіргі Атырау) облысында дүниеге келген.
1991 жылдан - Жастар ісі жөніндегі мемлекеттік комитетінің төрағасы. 1993 жылдан - Президент көмекшісі. 1995 жылдан - Премьер-министрдің орынбасары.
1997 жылдан - Премьер-министрдің орынбасары - Білім және мәдениет министрі.
1997 жылдан - Президент Әкімшілігі басшысының орынбасары, ұйымдастыру-бақылау бөлімінің меңгерушісі.
1998 жылдан - Президенттің бірінші көмекшісі. 1999 жылдан - Атырау облысының әкімі. 2000 жылдан - Премьер-министрдің орынбасары.
2002 жылдан - Премьер-министр. 2003 жылы - Мемлекеттік хатшы.
2004 жылы Президент Әкімшілігінің басшысы болып тағайындалды. 2004 жылдың желтоқсан айынан 2008 жылдың сәуіріне дейін - Алматы қаласының әкімі.
2008 жылғы сәуір айынан бастап - Астана қаласының әкімі. 2014 жылдың қазанынан ҚР Қорғаныс министрі болды.
2016-2017 жылдары - Премьер-министрдің орынбасары.
2017 жылы Қазақстанның Ресейдегі Төтенше және өкілетті елшісі болып тағайындалды.
Ал 2019 жылы 18 желтоқсанда Мемлекет басшысы Қасым-Жомарт Тоқаевтың Жарлығымен Иманғали Нұрғалиұлы зейнет жасына толуына байланысты Қазақстан Республикасының Ресей Федерациясындағы Төтенше және өкілетті елшісі қызметінен босатылған еді.
