Ғалымдар адамдардың неге үнемі салмақ қосатынын анықтады. International Journal of Obesity (Семіздік жөніндегі халықаралық журнал) басылымында жарық көрген шолу мақалада зерттеушілер таныс күн тәртібінің уақытша бұзылуы – жыл сайынғы дене салмағының артуының басты себебі болуы мүмкін екенін жүйелі түрде қарастырған, деп хабарлайды BAQ.KZ тілшісі.
Мұнда адамның күнделікті тамақтану және қозғалыс әдеттерінің уақытша өзгеруі сөз болып отыр. Бұл әдеттер кейде жағымсыз оқиғалар салдарынан бұзылады – мысалы, жарақат алу, ауру немесе күйзеліске түсу себеп болады. Ал кейде бұл өзгерістер жағымды жағдайлармен де байланысты: демалыс, мерекелік күндер немесе басқа жерге көшу секілді. Авторлардың пікірінше, дәл осындай "өмірлік ауытқулар" көп адамдарда май жиналуының негізгі себебі болуы мүмкін.
Бұл болжам семіздік неге өсіп бара жатқанын жақсы түсіндіреді – әсіресе адамдар дұрыс тамақтанып, спортпен айналысуға тырысып жатса да, жағдай өзгермей тұрғанын. Мақалада айтылғандай, дене салмағы біртіндеп емес, белгілі бір секірістермен артады – яғни адамның күн тәртібі уақытша бұзылған сәттерде. Бұл бұрыннан белгілі деректермен сәйкес келеді: күйзеліс кезінде ағзада кортизол мен инсулин гормондарының бөлінуі артады, қандағы қант мөлшері төмендейді, ал ағза жоғары калориялы тағамдарға көбірек құмартатын болады.
Авторлар ерекше атап өтеді: егер шынымен осындай қысқа уақыттық кезеңдер шешуші рөл атқаратын болса, онда семіздіктің алдын алу әлдеқайда оңай болуы мүмкін. Ол үшін тек осал сәттерде мінез-құлықты тұрақтандыруды үйрену жеткілікті.
