2022 жылғы 27 желтоқсанда Шымкент қаласының тұрғындарымен кездесу барысында Әсет Мағауов жанар-жағармай материалдары нарығын реформалау туралы айтты, деп хабарлайды BAQ.KZ.
2022 жылғы шілдеде Министрліктің бұйрығымен АИ-80, 92-93, сондай-ақ дизель отынын бөлшек саудада өткізуге арналған шекті бағаларды мемлекеттік реттеу сақталды. АИ-95-ке баға бәсекелестік ортаға беріледі және оны нарық анықтайды, өйткені АИ-95 және одан жоғары өнімді өндірген кезде қымбат импорттық қоспалар мен жоғары октанды компоненттердің үлкен шығыны қажет, олардың бағасы мұнай бағасымен және айырбас бағамымен байланысты.
Мемлекет Басшысы Қасым-Жомарт Тоқаевтың жанар-жағармай материалдары нарығын реформалау жөніндегі тапсырмасын орындау шеңберінде мұнай өнімдерін өндіру және тарату саласында ашықтық пен транспаренттілікті қамтамасыз ету, сараланған бағаларды әзірлеу арқылы дизель отынының жетіспеушілігін болдырмау жөнінде шаралар қабылдануда, сондай-ақ мұнай өнімдерін автокөлікпен әкетуге тыйым салуды 2022 жылдың соңына дейін ұзарту жөнінде бұйрық қабылданды және қазіргі уақытта мұнай өнімдерін тыйым салуды 2023 жылдың 1 жартыжылдығының соңына дейін ұзарту бойынша жұмыс жүргізуде.
Бүгінгі таңда Министрліктің дизель отынының бағасын саралауды көздейтін бұйрығы бар. Белгіленген көлемнен жоғары және транзиттік көлікке баға 1 литр үшін 450 теңге болады. Азаматтар үшін жүргізуші куәлігін көрсеткен кезде 100 литрге дейін және жүк көлігіне, арнайы автокөлікке техпаспорт ұсынған кезде 300 литрге дейін 230/260 теңге бағамен беріледі. Министрлік бұйрықтың қолданылуын ұзарту бойынша жұмыс жүргізуде.
Сондай-ақ, 2023 жылы Шымкент МӨЗ-нің 9 млн.тоннаға дейін кеңейтудің базалық жобалауы басталады.
Энергетика министрлігі сұйытылған мұнай газының бөлшек саудада бағасы 60 теңге болған кезде СМГ-ның көтерме сауада бағасын тоннасына 33 600 теңге көлемінде бекітті.
Әсет Мағауов Бәсекелестікті қорғау және дамыту агенттігімен бағаны мемлекеттік реттеуді ұзарту бойынша жұмыстар жүргізіп жатқанын атап өтті. Шымкент қаласы үшін СМГ-ның бөлшек сауда бағасы 1 литр үшін 60-65 теңге мөлшерінде қалады.
Қалада 27 газ толтыру станциясы (көтерме) және 192 автомобильге газ құю станциясы бар. Қалада сұйытылған мұнай газын тұтыну 2021 жылы 70,8 мың тоннаны құрады. 2022 жылдың қаңтар-қараша айларында шамамен 110 мың тонна тұтынылды.
Сонымен қатар 2023 жылы «Сұйытылған мұнай газының айналымын реттеу процестерінің реинжинирингі мәселелері бойынша» Заң қабылданады деп күтілуде, онда:
- белгіленген бөлшек сауда бағаларын негізге ала отырып, өндіруші зауыттардың өндірушілердің сұйытылған мұнай газына шекті көтерме бағаларын айқындау жөніндегі қағидаларды бекіту;
- АГҚС бөлшек сауда бағасын бекітуді ҚР Энергетика министрлігіне бекітіп беру көзделген. Заң жобасы Қазақстан Республикасы Парламентінің Мәжілісінде.
