Нұр-Сұлтан, BAQ.KZ тілшісі. Бүгін екі елордалық мектепте бет-әлпетті тану жүйесі іске қосылды, ол бірден температураны өлшеп, масканың болуын тексереді.
Бұдан басқа, қазақстандық әзірлеме деректер базасында тіркелмеген адамдардың мектепке кіруін шектейді және оқушылардың, оқытушылардың және барлық қызметкердің келіп-кету уақытын қадағалауға мүмкіндік береді.
Бұл - бірқатар себепке байланысты барынша қауіпсіз жүйе. Біріншіден, көптеген мектепте кіру үшін пластикалық карталар қолданылады. Ол картаны балалар қолына алады, сосын барлығы бір турникетке басып өтеді. Яғни барлығының карталары мен қолдары бір жерге тиеді, ал пандемия жағдайында бұл вирус жұқтыру қаупін арттырады. Екіншіден, көптеген ғимаратта кіреберісте температураны бір адам аппаратпен тексереді. Оқушылар көп болғандықтан дене температурасын дұрыс өлшеуге уақыт бола бермейді. Үшіншіден, оқушылар әрдайым қашықтықты сақтамайды. Clockster жүйесі осы жағдайларды шеше алады, - дейді Clockster өкілі Арман Ерназаров.
Қазақстандық Clockster әзірлемесі - жұмыс уақытын есепке алуға арналған HR-жүйе. Бұл ыңғайлы, өйткені ол әр түрлі биометриялық құрылғылармен біріктірілуі мүмкін.
Әзірлеушілердің айтуынша, Clockster жүйесі ерекше, өйткені компания базасында мәліметтер болмаған кезде жүйе адамның бет биометриясын танымайды және оны ғимаратқа кіргізбейді. Әзірлеме пилоттық жоба аясында елорданың №22 және №59 мектептерінде іске қосылды.
«Astana Innovations» АҚ Басқарма төрағасы Әділет Нұрғожиннің айтуынша, басты міндет – балалардың қауіпсіздігін қамтамасыз ету.
Балалардың қауіпсіздігін қамтамасыз ету – бұл бірінші кезектегі міндет. Мектепке кіргізетін карталар үнемі жоғалады немесе бөтен адамның қолына түсіп қалуы мүмкін. Ал Clockster жүйесі ешқандай картаны керек етпейді, тек базада сіз туралы ақпарат болуы қажет. Жүйенің тағы бір ерекшелігі - баланың сабаққа қатысуы туралы хабарлама мектеп басшылығы мен ата-аналарына бірден келеді. Деректердің сақталуына Clockster және деректердің иелері болып табылатын пайдаланушылардың өздері жауапты болады, - деді ол.
Қазіргі уақытта отандық әзірлеушілердің 200-ден астам клиенті бар, олардың 80%-ы Қазақстан аумағында, қалғандары - Ресей, Украина, Өзбекстан, Филиппин, Сингапур, Индонезия және Үндістаннан.
Біздің жоба 2020 жылы «Кибер шабуылдарды талдау және тергеу орталығында» осалдықтарды табуға тестілеуден өтті, олардың ұсыныстары бойынша барлық ықтимал осалдықтар жойылды, - дейді Арман Ерназаров.
Айта кетейік, Astana Innovations Нұр-Сұлтан қаласының әкімдігімен бірлесіп, елорда тұрғындары мен қонақтарының тұруы үшін қолайлы және жайлы жағдай жасайды.
Осылайша, «Ақылды аудан» жобасы аясында Astana Innovations енгізуге дайын шешімдері бар компанияларды табады. Нәтижелер сәтті болған жағдайда, жүйені елорданың басқа мектептерінде де орнату ұсынылады.
