Нұр-Сұлтан, BAQ.KZ. Қазақстан Республикасының Денсаулық сақтау министрлігі «Стелс-Омикрон» штамын анықтады.
Денсаулық сақтау министрлігі елдегі коронавирус инфекциясы штамдарының айналымына мониторингті жалғастырып жатыр.
Сәуір-мамыр айларында жүргізілген ПТР скринингінің нәтижелері бойынша коронавирус инфекциясының әртүрлі штамдарының айналымы анықталды.
Барлық өңірде BA.1 «Омикрон» штамы – 98,6%, оның ішінде 12 өңірде BA.2 «Стелс-Омикрон» – 36,7%, B.1.617-Delta – 1,4% анықталды.
ПТР скринингінің нәтижелерін растау үшін толық геномды секвенирлеу жүргізілді. Жүргізілген толық геномды секвенирлеу нәтижесі бойынша BA.2 «Стелс-Омикрон» штамының – 93,8% (Ақтөбе, Алматы, Атырау, Шығыс Қазақстан, Қызылорда, Қостанай, Қарағанды, Маңғыстау, Павлодар, Солтүстік Қазақстан облыстары, Алматы және Нұр-Сұлтан қалалары), BA.1 «Омикрон» штамының – 6,2% (Атырау, Қызылорда, Қарағанды облыстары, Алматы және Нұр-Сұлтан қалалары) айналымы анықталды, - делінген хабарламада.
Эпидемиологиялық жағдайдың тұрақтануына қарамастан, министрлік коронавирус инфекциясына қарсы уақтылы вакцинациядан, ревакцинациядан өтуге кеңес береді.
Қазіргі уақытта Қазақстанда КВИ-ға қарсы вакцинациялау және ревакцинациялау үшін вакцинаның 3 түрі бар (Пфайзер, Синофарм және КазВак), оның ішінде 2-уін Дүниежүзілік денсаулық сақтау ұйымы мақұлдаған.
