Нұр-Сұлтан, BAQ.KZ. Қазақстандағы эпидемиологиялық жағдайдың жақсаруына және әлемдегі карантиндік шектеулердің әлсіреуіне байланысты ИИДМ Азаматтық авиация комитеті халықаралық әуе тасымалдардың бағыттық желісін қалпына келтіру және кеңейту бойынша жұмысты жалғастыруда.
Бұл туралы ИИДМ баспасөз қызметі хабарлады.
Қазақстандық "Fly Arystan" әуе компаниясы ағымдағы жылдың 2 маусымынан бастап Алматы – Ереван бағыты бойынша аптасына 2 рейс жиілігімен (дүйсенбі, бейсенбі) Арменияға тұрақты рейстерді орындауды бастауды жоспарлап отыр.
Билет құны бір жаққа 28 мың теңгеден басталады.
Рейстер санитарлық-эпидемиологиялық талаптарды қатаң сақтай отырып және әуекомпания сайтында жарияланған кестеге сәйкес А320 типті әуе кемелерінде орындалатын болады.
