Нұр-Сұлтан, BAQ.KZ. Спутник V вакцинасын өндірушілер Дүниежүзілік денсаулық сақтау ұйымының штаб-пәтеріне сертификаттауға өтініш берді.
Бұл туралы ДДСҰ-ның Ресейдегі ресми өкілі Мелита Вуйнович Мәскеу Эхо радиостанциясына берген сұхбатында хабарлады.
Оның айтуынша, ДДСҰ әлі бірде-бір вакцинаны жариялаған жоқ, себебі әр вакцина алдымен Emergency Use Listing бағалау жүйесінен өтуі керек.
Бұл - пандемия жағдайында жасалатын шартты сертификаттау. Елдегі барлық вакцина осындай сертификаттаудан өтуі керек, Ресей Федерациясында Спутник V вакцинасын өндірушілер ДДСҰ штаб-пәтеріне сертификаттауға өтініш берді, - деді Вуйнович.
Айта кетейік, 11 тамызда Ресей Президенті Владимир Путин Ресей коронавирус вакцинаны тіркеген әлемдегі алғашқы ел болды деп мәлімдеді. Кейінірек ол Спутник V деп аталды.
Ресейде оның тиімділігі 92%-ға бағаланды. Оның сынақтары кезінде 20 адам коронавирус жұқтырғаны туралы хабарланды, бірақ ол әлі де өндіріледі.
