Нұр-Сұлтан, BAQ.KZ. Бүгін «Таза табиғат» ұлттық экологиялық жобасы аясында бірқатар өңірде аумақты қоқыстан тазарту бойынша «Бірге таза Қазақстан» акциясы өтті.
Мәселен Маңғыстау, Жамбыл, Түркістан, Қызылорда облыстарында, сондай-ақ Шымкент қаласында 1,8 мың тоннадан астам қоқыс жиналды.
Акция аясында елді мекендердің төңірегіндегі рұқсат етілмеген қоқыс тастайтын жерлерді жою, қалалардың рекреациялық аймақтарын, саябақтары мен аллеяларын тазарту жұмыстары жүргізілді. Аулаларды тазалау жұмыстарына өңірлер мен ұйымдардың тұрғындары барынша тартылды. Оған еріктілер, экобелсенділер, қоғам белсенділері де қатысты. Қатысушылар саны шамамен 60 мың адамды құрады. Бұл 5 мыңнан астам волонтер, 13 мыңнан астам мемлекеттік органдардың өкілі, 37 мыңнан астам азамат, - делінген таратылған хабарламада.
Акция барысында 675 гектар жер тазартылды.
Айта кетейік, жиналған қоқыс сұрыпталып, қайта өңдеуге жіберілді. 150 тоннадан астам шыны, 181 тонна пластик, 99 тонна резеңке, 208 тонна қағаз бен картон, 107 тонна металл тапсырылды.
Естеріңізге сала кетейік, бүгін елімізде Мемлекет басшысының бастамасымен «Таза табиғат» ұлттық жобасы бастау алды. Экология, геология және табиғи ресурстар министрлігі бірқатар өңірде ағаш отырғызу, бұлақтар мен су айдындарын, аумақтарды қоқыстан тазарту бойынша экологиялық акциялар өткізді.
