«Батырларға тағзым» акциясы: Алматылықтар қаһарман жерлестерімізді еске алды

9 мамыр күні Алматыда Жеңістің 80 жылдығына арналған «Батырларға тағзым» атты патриоттық акция өтті, деп хабарлайды Алматыдағы BAQ.KZ тілшісі.

28 гвардияшы-панфиловшылар саябағындағы мемориалдық кешен қазақстандық батырлардың рухына тағзым ететін қасиетті орынға айналды. Мыңдаған алматылықтар осы маңызды іс-шараға қатысуға жиналды. Шеру колоннасына әскери үрмелі аспаптар оркестрі, құрметті қарауыл ротасы және ардагерлер ұйымдарының өкілдері жетекшілік етті. Қатысушылар Орталық мәдениет және демалыс саябағынан бастап, Панфиловшылар саябағына дейін жүріп өтіп, Мәңгілік алауға гүл шоқтарын қойды.

Мәңгілік алау жанындағы салтанатты рәсім іс-шараның басты сәті болды. Әскери әуен орындалып, Қазақстанның көк туы биікке көтерілді, бір минуттық үнсіздік жарияланды. Акция қатысушылары ата-бабаларының рухына құрмет көрсетті.

Саябақ аумағында ерекше рухани атмосфера қалыптасты. Оркестр әскери әндерді орындады, тұрғындар батырларды еске алып, естеліктерімен бөлісті, Даңқ мемориалы жанында суретке түсіп, гүл шоқтарын қойды.

Іс-шара Алматы қаласы әкімдігінің қолдауымен және ардагерлер ұйымдарының бастамасымен ұйымдастырылды. Акцияны өткізуге 500-ден астам волонтер атсалысты.