Елордада «Гендерлік теңдік» бағдарламасына қатысқан білім алушылардың салтанатты марапаттау рәсімі өтті, деп хабарлайды BAQ.KZ тілшісі.
Бағдарлама ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссияның қолдауымен құрылған. Негізгі мақсаты - басқару бағытындағы көшбасшы әйелдердің үлесін арттыру.
ҚР Президент Әкімшілігі Басшысының орынбасары Аида Балаева әйелдердің қоғамдағы рөлін ерекше атап өтті.
Әйел азаматтарын қолдау - Мемлекет басшысының назарындағы мәселе. Әйелдердің бастамалары мен басшылық сатыда алға басып жүруін өзі жеке қадағалап отырады. Қоғамның әр саласында қыз-келіншектердің саны артып жатқаны барлығымызға мәлім. Бүгінгі жасалып жатқан іс-шара да мемлекеттік қолдаудың бір көрінісі деп білеміз. Сондықтан да біздің қоғамда әйел-ананың орны құрметпен бағаланады. Әйел араласқан қай істе де береке бар, - деді ҚР Президент Әкімшілігі Басшысының орынбасары, Қазақстан Республикасы Президенті жанындағы Әйелдер істері және отбасылық-демографиялық саясат жөніндегі ұлттық комиссияның төрағасы Аида Балаева.
Сондай-ақ «Самұрық-Қазына” Акционерлік қоғамы да әйел басшылардың санын арттыруды қолға алған.
Қор гендер теңдігі бойынша мемлекет саясатын толық қолдайды. Біз өз компанияларымыздың басқару органдарында әйелдер санын арттыру бойынша міндеттеме алдық, - дейді “Самұрық-Қазына” АҚ төрағасы Нұрлан Жақыпов.
«Гендерлік теңдік» бағдарламасы әйел басқарушыларға жеке өсуді, әлеуетті және көшбасшылық қасиеттерді дамытуға, тәжірибе алмасуға мүмкіндік беретін жоба. Бүгінгі таңда жобаға 142 әйел өтініш білдірсе, соның 71-і сәтті аяқтаған.
